1. هذا الموقع يستخدم ملفات تعريف الارتباط (الكوكيز ). من خلال الاستمرار في استخدام هذا الموقع، فإنك توافق على استخدامنا لملفات تعريف الارتباط. تعرف على المزيد.

جدول سياحي لمدينة الضباب بريطانيا

الموضوع في 'بوابة السفر إلى بريطانيا' بواسطة alyaa, بتاريخ ‏25 أغسطس 2014.

هوتيل فور ارب | Hotel For Arab

دليل ماليزيا

  1. alyaa

    alyaa مراقبة عامة

    إنضم إلينا في:
    ‏16 يونيو 2012
    المشاركات:
    7,692
    الإعجابات المتلقاة:
    6
    أَعْجَبَ:
    0
    Dislikes Received:
    0
    نقاط الجائزة:
    36
    الإقامة:
    malaysia
    جدول سياحي لمدينة الضباب بريطانيا




    تقريبا الجدول لمده 15 يوم في رحاب المملكه البريطانيه ،، وكل شخص له حريه اختيار الايام اللي يبها تعتمد على حساب اقامتكم فيها ..

    نبتدي بسم الله وتوكلنا على الله ..

    اليوم الاول :
    لوقلنا وصلتوا الظهر او الصبح وريحتوا ساعه او حتى لو وصلتوا متأخر تقدرون اتخلونه لليوم اللي بعده ..

    الباص السياحي bus tour

    طبعا الباص السياحي يفركم على اهم معالم لندن ومنها : لندن اي london eye ، متحف الشمع madame tussaud ، قصر باكينغهام قصر الملكه Buckingham palace وفيه تبديل عرض تبديل الحرس الساعه 11:30 ، جرين بارك green park ، قصر كينزجتون kensington palace ، المتحف البريطاني british museum ، ساعه بيغ بين big ben ، والبرلمان the parliament ، جسر لندن المشهور على نهر التايمز london bridge ، شارع الاوكسفورد oxford st شارع التسوق لكل دور الازياء ومع شارع ريجينت regent st ، وبيكاديللي سيركس piccadilly circus وفيها مطاعم وكافيهات وناس ترسم ومسارح وسينمات ومجمع العاب الكترونيه ومحلات سوفنيرس ، ترافلقار سكوير trafalgar square فيها متحف وساحه الحمام ، ومن ضمن الرحله هذي في تذكره لكروز اتمشى فيكم في نهر التايمز ..

    وفي محطات يوقف فيها الباص تقدرون تنزلون واتمشون في المكان وبعدها تردون تركبون من المكان اللي نزلتوا منه في نفس باص الشركه ..

    محطات الباص موجوده عند : hyde park corner ، marbel arch ، oxford circus ، baker street ، piccadilly circus

    هذا سايت الشركه : http://www.bigbustours.com/eng/londo...ng_tour&gclid=

    وهذا سايت متحف الشمع الاحسن تحجزون منه قبل ماتروحون لان وايد زحمه ودوور طووويل ..

    http://www.madametussauds.com/London/

    اليوم الثاني :
    راح يكون لمنطقه كوفنت قاردن covent garden

    تقدرون تروحون لها بالاندرقراوند

    from : marble arch to holborn على الخط الاحمر وبعدها اتبدلون
    from : holborn to covent garden على الخط الكحلي

    http://www.tfl.gov.uk/assets/downloa...d-tube-map.pdf

    وهذي المنطقه فيها محلات ومطاعم وعروض شخصيه وسوق صيني وبسطات المكان وايد حلو يعني يستاهل تروحون وتشوفونه ..

    وبعد ما اتمشون فيه تقدرون تروحون مثلا الباخره الحربيه belfast hms اللي شاركت في الحرب العالميه الثانيه واهي الحين متحف مخلينها ..

    عندكم كافيه صغير في الاوكسفورد عنده وافل لذيذ اسمه pure waffle في duke st
    اذا كنتوا في الاوكسفورد خلوا اديداس على ايدكم اليمين من ينتهي محل اديداس في فتحه على اليمين اخذوها امشوا اشوي يمكن 30 متر او اقل راح تلقون الكافيه على يمنكم صغير .. الوافل بالجبن والفلفل لذيذه مع البرد [​IMG] وطبعا الكاكاو والبرد الذ ..

    اليوم الثالث :
    هذا اليوم اتخلونه ل التون تاور مدينه الملاهي alton tower وتبعد عن لندن بالقطار تقريبا ساعتين ..

    هذا سايت المدينه : http://www.altontowers.com/theme-park/

    تروحون من محطه
    euston to stoke-on-trent rail station وبعدها ياخذكم شتل التون تاور ويوصلكم لي المدينه وتبعد عن المحطه تقريبا 30 دقيقه ..

    تقدرون تحجزون لها من السايت نفسه او المكاتب في الادجودروود وسعر التذكره تقريبا 35 باوند للكبير والصغير 30 .. لما تروحون محطه القطار وتاخذون التذكره على قطار فيرجين سألوهم عن العرض العائلي لمده سنه تره سعره واايد حلو يعطيكم خصم حلو ..

    اليوم الرابع :
    الصبح انخليه سوق وفراره تقعدون على راحتكم عقب رحله امس وعقب ما اتخلصون من السوق في الاوكسفورد والشوراع المتفرع منه من بوند ستريت وريجنت او اذا تبون متاحف عندكم متحقف الطبيعه والمتحف العلمي يم بعض واقرب محطة لهم south kensington وبعدها ترجعون الفندق اتقطون اغراضكم وتريحون وبالليل تروحون ليستر سكوير : مكان قهاوي وسينمات ومطاعم وعروض المكان حلو للتغير ..

    اليوم الخامس :
    انخليه للاوت لت Bicester village

    تطلعون من محطة
    marylbone station to bicester north

    طبعا لما تحجزون القطار حجزوا مره وحده تذاكر الشتل عشان اويصلكم من المحطة لي السوق والعكس .. الاوت لت كل الماركات تقريبا فيه ويبعد عن لندن ساعه وسعر التذكره كامله تقريبا 17 باوند .. وهذا سايت الاوت لت تقدرون تشوفون المحلات اللي فيه ومتى يفتح ويسكر ..

    http://www.bicestervillage.com/

    عقب ماتردون على المسيان تروحون مجمع westfield في shepherds bush
    بالاندرقراوند

    marble arch to shepherds bush اول ماتطلعون من المحطه تشوفون المجمع على ايدكم اليسار بالويه فيه كل المحلات والماركات ومطاعم وسينمات ..

    اليوم السادس:
    هذا اليوم راح يكون دسم لان بنروح لمصنع الكاكاو كادبوري cadbury factory
    هذا سايتهم وفي ارقامهم وعنوانهم والاسعار

    http://www.cadburyworld.co.uk/Cadbur...buryWorld.aspx

    لازم اتحجزون قبلها بجم يوم تتصلون عليهم .. واهو موجود في منطقه برونفيل واكثر يصلح للاطفال واقرب منطقه له بيرمنغهام ..

    تطلعون بالاندرقرواند على اي اقرب محطه وتروحون على محطه ايستون .. في الجدول هذا افترضنا اقرب شي ماربل ارتش راح تكون طلعتكم:

    from : marble arch to tottenham court road على الخط الاحمر ويسمى central line
    وبعدين from : tottenham court road to euston على الخط الاسود ويسمى nortren

    هذي خريطه الاندرقراوند وتقدرون تشوفون محطه ايستون على الخط الاسود فوق

    http://www.tfl.gov.uk/assets/downloa...d-tube-map.pdf

    من ايستون اهي محطة رئيسيه للقطارات لمدن بره لندن تنزلون فيها واتحجزون من عرض فيرجين العائلي السنوي اللي فيه خصم يعني تذكره الكبار للرحله هذي اتكلف 44 باوند مع الخصم تصير 27 باوند والصغار من 27 باوند الى 8 باوند خصم حلو انصحكم تاخذون العرض اوفرلكم ..
    راح تطلعون من ايستون الى برونفيل

    from : euston to bronville

    اليوم السابع :
    شارع برتوبيلو portobello market

    سوق مشهور عالميا ويفتح يوم السبت ( يعني سوق السبت ) كل شي فيه اتحصلونه من انتيكات زهور واكل والخ ... يفضل اتمشون في بالنهار حلو وهذا سايته وشلون تروحون له بالتاكسي او اندرقراوند او باص ..

    http://www.portobellomarket.org/howtogetthere.htm

    بعدها تروحون الفندق اتريحون اشوي وتطلعون اتمشون في harrods معروف هارودز كل الماركات العاليمه فيه ويقع في نايتس بريدج وهذا المنطقه تعتبر من المناطق الغاليه في لندن .. واللي كان يملك هادرودز اهو محمد الفايد الملياردير المصري والحين صار ملك شركه قطر القابضه .. عقب ماتخلصون منه واتمشون في نايتس بريدج لان في محلات ماركات بره ومطاعم عندكم مطعم الايطالي المشهور في هارودز اتعشون فيه ويكون مكان عند الفود هول food hall واسمه pizzeria .. او تبون عراقي اسمه مسكوف بره هارودز مقابل للسفاره الكويتيه واكله وايد حلو ،، او اشبيليا لبناني من صوب كازينو هيلتون واكله وايد حلو ..

    تقدرون تروحون له بالاندرقراوند من bond street to green park على الخط الرمادي (جوبلي لاين )
    وبعدين من green park to knightsbridge على الخط الكحلي (بيكاديلي لاين ) وانتوا طلعين من المحطه في اسهم على المخرج اللي يطلعكم صوب هارودز


    اليوم الثامن :
    عندكم اختيارين لمدينه ملاهي :

    1- thorpe park تعتبراقرب ملاهي على لندن تبعد 35 دقيقه وحلوه الواحد يروح لها .. هذا سايتهم فيها الاسعار ومتى تفتح وشلون توصلون لها ..

    من waterloo station to staines station وبعدها اهناك في شتل مكتوب عليه ثورب بارك يوصلكم لها .. اذا حجزتوا نفس اليوم السعر يكون شامل ضرايب 39 باوند واذا حجزتوا من السايت يطلع عليكم 27 باوند ..

    http://www.thorpepark.com/plan-your-...-get-here.aspx

    2- chessington world of advventures الاختيار الثاني بعد مدينه العاب .. وهذا سايتهم في كل شي .. سعرها عند البوابه 37 باوند وفي السايت 27 .. وتبعد عن لندن 33 دقيقه ..

    http://www.chessington.com/

    من waterloo or clapham junction and wmbledon to chessington south station وبعدها 10 دقايق مشي انتو في المدينه .

    هذا سايت القطار تقدرون تشوفون منه وين بتروحون على اي منطقه بره لندن جم تبعد واتحجزون ..

    http://ojp.nationalrail.co.uk/en/s/timetable/times

    اليوم التاسع :
    عندكم مصنع بربري burbery factory

    المصنع حلو واسعاره اقل من بره ويستاهل تروحون له .. شلون تروحون له 3 طرق عندكم وينصح زيارته الصبح يعني على 9 تطلعون لان الدرب 30 دقيقه والمنطقه اشوي موحلوه ..
    1 - تاكسي وتعطونه العنوان http://www.victoriaparkvillage.com/burberry.html
    2- الباص رقم 30 من محطه الباص اللي بين فندق تشريشل وثيستل ماربل ارتش ..
    3- الاندرقراوند وخلكم معاي منتبهين .. انا ودي احدد المحطات بس موعارفه شلون [​IMG]

    نرد على محطتنا marble arch على الخط الاحمر سنترال لاين باتجاه اليمين لما توصلون محطه startford عليها علامه معاقين اشوي صاعده فوق ..
    تنزلون startford ومنها تاخذون الخطين اللي باللون البرتقالي واسمه overground من محطة start ford to hackney central

    تنزلون hackney central تطلعون منها تلقون سوبرماركت tessco اتخلونه على ايدكم اليسار وتمشون مشي دقيقتين راح تلقون المصنع في مبني لونه بني ما ايبين عدل اذا ما شفتوه سألوا ....[/B]

    وبعدين اتمشون في السوق او تروحون الحدايق وتأجرون هذيل ما ادري شنو اسمهم قوارب صغيره مثل القواري (الدراجات ) في البحيره الهايد بارك hayde park وريجينت بارك regents park ..[/COLOR]
    اليوم العاشر :
    [COLOR="Purple"]بعد راح يكون لندني عندكم لندن زو london zoo في ريجينت بارك .. عندكم سوق الاحد sunday market في شارع ليفربول liverpool street ..

    سايت لندن زو

    http://www.zsl.org/zsl-london-zoo/

    الريجنت بارك توصلون لها بالاندرقراوند من

    from : bond street to baker street على الخط الرمادي جوبلي اهي اول محطه من بعد بوند ستريت راح تشوفونها فوق على خط البني bakerloo ..

    او لما توصلون محطة baker st على خط bakerloo البني من اهناك تاخذون نفس الخط البني على محطة regents park ..

    شارع ليفربول تاخذون الخط الاحمر central line بأتجاه اليمين المحط الثامنه تشوفون liverpool street اذا طالعين من marble arch

    http://www.tfl.gov.uk/assets/downloa...d-tube-map.pdf

    اليوم الحادي عشر الى الثالت عشر :
    راح تكونون بره لندن واقترح عليكم تروحون بلاكبول blackpool تنامون ليله وبعدها اليوم الثاني تطلعون منها وتروحون مانشستر وتنامون ليله manchester .. هذيل سايتات عن بلاكبول ومانشستر .. بلاك بول وايد حلوه وفيها العاب على البحر ونيسه ونفس الشي مانشستر حلوه تزورون ناديهم وحدايقهم ومجمع ترافورد والخ ..

    عن بلاك بول : http://www.visitblackpool.com/site/attractions

    عن مانشستر : http://www.visitmanchester.com/#/htt...g-centres.aspx

    تروحون من محطه استون euston الى بريستون preston(lancs

    وبعدها من preston (lancs) to blackpool north

    مدتها ساعتين و 8 دقايق

    http://ojp.nationalrail.co.uk/en/s/t...&callingPage=t

    ومن لندن ايستون الى مانشستر المده ساعتين و12 دقيقه من غير تبديل

    http://ojp.nationalrail.co.uk/en/s/timetable/times

    من بلاكبول الى مانشستر بيكاديلي مدتها ساعه وربع

    http://ojp.nationalrail.co.uk/en/s/timetable/times


    اليوم الرابع عشر :
    ليجولاند legoland

    http://www.legoland.co.uk/

    حلوه بس الاطفال اكثر يحبونها .. لازرتوها زوروا مره وحده قلعه ويندسور الملكيه .. تبعد عن لندن ساعه .. المحطه الرئيسيه تطلعون لها وترلو waterloo

    من bond street to waterloo المحطة الرابعه على الخط الرمادي جوبلي لاين ..

    http://www.tfl.gov.uk/assets/downloa...d-tube-map.pdf

    ومن وترلو


    waterloo to windsor and eton riverside

    http://ojp.nationalrail.co.uk/en/s/timetable/times

    اتحجزون من العرض العائلي من محطة وترلو تذاكر لليجولاند مع الشتل ..

    اليوم الخامس عشر :
    بعد ماكو الا تقولون BYE BYE LONDON [​IMG]

    ملاحظااات :

    - التنقل من مطار هيثرو الى لندن والعكس :
    1- تاكسي واهو اغلى شي .
    2- تاجير سياره او سياره مع سايق ( تأجير سياره الشركات العالميه المعروفه : AVIS / BUDGET )

    سياره مع سايق هذا سايت مضمون ورخيص .. اتحددون من اي مطار وعلى اي منطقه رايحين داخل لندن وجم عدد الاشخاص والجناط ويطلع لكم السعر وتقدرون تدفعون لما توصلون مكانكم ..

    http://www.alphaminicab.com/

    3- قطار هيثرو اكسبرس . طبعا سريع ورخيص تقريبا 16 باوند للشخص انصح فيه اذا كنتوا 2 او 3 من غير اطفال .. يوصل من اي مبني على بادنقتون ستيشن ..

    http://www.heathrowexpress.com/Home

    4- ناقلات ناشيونال اكسبرس (ارخص شي ) واتوصل اي محطة في لندن مثل فيكتوريا وغيرها وطبعا يوصلون مناطق بره لندن مثل مانشستر ليفربول كارديف واسعارها اقل وايد من القطار بس مده اطول .. من المطار لي فيكتوريا اقل من 10 باوند ..

    http://coach.nationalexpress.com/tim...b-56ea623380ba

    - التنقل داخل لندن :
    1 - تكاسي (غاليه )
    2- اندرقراوند والباصات في بطاقه اويستر oyster card لمده اسبوع تقريبا 24 باوند انصحكم فيها ..

    https://oyster.tfl.gov.uk/oyster/entry.do

    التنقل مناطق بره لندن :
    1- سايت قطار فيرجين
    http://www.virgintrains.co.uk/

    2- سايت للكل

    http://www.nationalrail.co.uk/

    3- ناقلات ناشيونال اكسبرس (الارخص واطول مده )

    http://coach.nationalexpress.com/

    4- سايت يورو ستار اذا كنتوا بتطلعون من لندن لدول اوربيه

    http://www.eurostar.com/dynamic/_SvB...&lang=UK&VT=EB

    الباصات وارقامهم :
    - رقم 8 يروح : محطة فيكتوريا ، ماي فير ، اوكسفورد سيركس ، ماليبورن والعكس.
    - رقم 9 : ترافيلجار سكوير ساحه الحمام ، بيكاديلي ، كنزنجتون هاي ستريت ، همرسميث.
    -رقم 10 :محطة كينغ كروس ، محطة ايستون ، توتتنهام كورت رود ، اوكسفورد سيركس ، ماربل ارتش ، بيزوتر ، هيل قيت .
    -رقم 12 : ويست منستر ، بيغ بين ، ترافيلجار سكوير ، بيكاديلي ، اوكسفورد سيركس ،ماربل ارتش ، بيزوتر ، هيل قيت .
    -رقم 13 : ريجينت بارك ،ترافيلجار سكوير ، اوكسفورد سيركس بيكر ستريت .
    -رقم 14: ساوث كنزنجتون ، بيكاديلي ، توتنهام كورت .
    -رقم 15 : محطة بادينغتون ، ماربل ارتش ، ترافيلجار سكوير ، تاور اوف لندن .
    -رقم 16 : محطة فيكتوريا ، ماي فير ، ماربل ارتش ، ادجودروود (شارع العرب).
    -رقم 52: محطة فيكتوريا ، نايتس بريدج ، كنزنجتون هاي ستريت ، نوتينغ هيل قيت .
    -رقم 74 : بيكر ستريت (متحف الشمع ) ، ماربل ارتش ، نايتس بريدج ، كنزنجتون ،ايرلس كورت .
    -رقم 94: بيكاديلي ، ريجينت ستريت (ماك ستور ) ،اوكسفورد ، ماربل ارتش ، بيزوتر ، نوتينغ هيل قيت .

    المناطق اللي انصحكم تزورونها ولكم حريه الاختيار بعضهم بذكرهم والبعض الثاني راح اذكرهم في تقريري ..
    1 - برايتون brighton :

    http://www.visitbrighton.com/

    2- غلاسقو glasgow

    http://www.glasgowguide.co.uk/

    3- كارديف cardiff

    http://www.visitcardiff.com/

    4- بحيرات ليك ديستريك lake district واااايد حلوه لو تروحون يومين اتنامون اهناك ..

    http://www.lakedistrict.gov.uk/

    * نسيت حرب الاصباغ paintball ترا واايد حلوووه اللعبه لجميع الاعمار ويفضل قرووب تتصلون وتشوفون وين تلعبون ومتى ومع منو .. وهذا سايتهم .. تقدرون تضيفونها في اي يوم تبونه ..

    http://www.thepaintballcentre.com/index.html


     
    جاري تحميل الصفحة...
  2. ندى

    ندى مسافر

    إنضم إلينا في:
    ‏7 فبراير 2015
    المشاركات:
    5
    الإعجابات المتلقاة:
    0
    أَعْجَبَ:
    0
    Dislikes Received:
    0
    نقاط الجائزة:
    1
    الإقامة:
    الكويت الحبيبه
    رد: جدول سياحي لمدينة الضباب بريطانيا

    يسلمو على التقرير
     
  3. ابو نايف

    ابو نايف مسافر

    إنضم إلينا في:
    ‏16 فبراير 2015
    المشاركات:
    9
    الإعجابات المتلقاة:
    0
    أَعْجَبَ:
    0
    Dislikes Received:
    0
    نقاط الجائزة:
    1
    رد: جدول سياحي لمدينة الضباب بريطانيا

    تقرير جدا جميل الله يعطيك العافيه

    سؤالي ماذا يقصد تذاكر الشتل