مطاعم ومقاهي إيه إم بي إم - AMPM

الموضوع في 'مطاعم مصر' بواسطة menna, بتاريخ ‏12 يوليو 2016.

  1. men

    menna رحالة

    إنضم إلينا في:
    ‏18 يونيو 2016
    المشاركات:
    873
    الإعجابات المتلقاة:
    1
    أَعْجَبَ:
    0
    إبداءات عدم الإعجاب المتلقاة:
    0
    نقاط الجائزة:
    18
    الجنس:
    أنثى
    الإقامة:
    cairo
    {$title}
    الدور الأرضي - المرحلة الثانية, داخل سيتي ستارز
    مصر الجديدة, القاهرة, مصر.
    عالمي, قهوة

    مفتوح
    10 صباحًا - 1 صباحًا


    بصراحة كده المطاعم بـ تصعَّب علينا أننا ناكل بطريقة صحيّة وسط كمية الأكل المقلي اللي أصبح أسرع وأسهل أكل في القاهرة، إحنا معاكم أن فيه مطاعم كثيرة متخصصة في تقديم أكلات صحيّة في القاهرة، بس بعيدًا عن السلاطة مش هـ تقدر تلاقي اختيارات كثيرة، والمشكلة دي لها حل عند AMPM.

    AMPM هو مكان هادئ في المرحلة الثانية من سيتي ستارز بـ تتميز بقعدة شيك وبـ يعتمد على فكرة الأكل المُحضر مسبقًا واللي بـ تضمن تقديم وجبات طازجة لكل عملائهم وفي نفس الوقت خدمتهم بسرعة، AMPM فعلًا مناسب لكل الأذواق بـ تقديمه مجموعة كبيرة من السلاطات منها سلاطة كينوا (45 جنيه) وتكس ميكس تاكو (49 جنيه)، وأطباق رئيسية زي أوسّو بوكو أند كوسكوس Osso Bucco and Couscousبـ (79 جنيه)، وتشيكن بيكون أند مشروم (65 جنيه)، وبكده أكلهم ينفع كل الناس من الأكيلة الجامدين لغاية مدمني الجيم والرياضة.

    نبدأ؟ يلا بنا، أول حاجة طبعًا كانت المقبلات، واختارنا منها تاي سلاد (35 جنيه) وناتشوز (10 جنيه)، ومعاهم أورانج شوكو ميلك Orange Choc Milk بـ (15 جنيه) وبيتش كوكتيل Beach Cocktail بـ (15 جنيه).

    البيتش كوكتيل كان خلطة منعشة من الخوخ والبرتقال والتوت الأحمر، أما كومبو البرتقال والشوكولاتة –وهو من أكثر الحاجات اللي مش واخدة حقها– فكان ممتاز؛ الطعم المزز للبرتقال مع سكّر الشوكولاتة عمل توازن هايل للطعم، المهم أن السكّر في المشروبين كان مضبوط.

    في الأول حسّينا أن التاي سلاد بشرائح الجزر وقطع الكرنب والفول "الحراتي" مش مميزة من ناحية النكهة والطعم لكن لما دخلنا على الفراخ المشوية بامتياز والنولدز اللذيذة والفول السوداني ومرشوش عليهم صويا صوص، نقدر نقول بكل ثقة أنها فريدة من نوعها، الناتشوز كانت أبسط شوية بس برضه لذيذة؛ صوص الجبن كان لذيذ والصلصة لها نكهة مميزة مع شوية شطشطة.

    فكرة الأكل المُحضر مسبقًا كانت مناسبة مع السلاطات، بس خوفنا شوية لما دخلنا على الأطباق الرئيسية، قررنا نطلب بط مدخن بالشعرية Smoked Duck with Vermicelli بـ (65 جنيه) وسلامون آسيوي Asian Salmon بـ (79 جنيه) وإحنا متوقعين ناكل بطة ناشفة وسلامون مش مستوي، بس اللي حصل فعلاً أن الأكل طلع روعة.

    السلامون اللذيذ الطري كان عليه سمسم محمص وفوقهم ترياكي صوص، أما الطلب الجانبي وهو النودلز –ومعاه فلفل رومي وذرة ومشروم– فكان ممتاز.

    صحيح السلامون كان هايل، بس البط المدخن سحب البساط من تحت الكل، عبارة عن شرائح بط رفيعة طرية ومستوية تمام، أما الشعرية اللي فيها قراصية ولوز مطحون فأضافت كثير للطعم خصوصًا مع نكهتها المسكّرة، الطبق كمان معاه شوية مكعبات بطاطس وبصل مقرمش، وصحيح طعمهم كان لطيف، بس مش ماشيين مع الطبق وما كانش لهم لزوم.

    خلصنا الأكل في AMPM بواحدة براوني (18 جنيه) عليها شوية كراميل وصوص شوكولاتة، وكل اللي نقدر نقوله أنها بـ تذوب في فمك من جمالها، وطعم الشوكولاتة واضح في كل قضمة.
     
    الوسوم:
comments powered by Disqus

مشاركة هذه الصفحة

جاري تحميل الصفحة...