رحلتي الي تركيا بالصور والتفاصيل 2017

M

Mohamed Rezk

عضو

السلام عليكم يا شباب :)
البوست ده هشاركم فيه تجربتى للسفر لتركيا الشهر اللى فات و بالذات اسطنبول :)
- أول حاجة قبل السفر اجراءات التأشيرة ؛ انا سافرت مع واحد صاحبى مع نفسنا ؛ كل اللى عملته مبدئيا قدمت على التأشيرة الأول و دى سهلة ان شاء الله و بالخطوات دى :-
1- لازم تقدم عليها Online من على الموقع الرسمى بتاع السفارة

هتحتاج الاوراق المطلوبه تكون منها Soft Copy عشان بتعمل Upload ليها و انت بتقدم على التاشيرة و هى كالاتى :-
- صورة شخصية خلفية بيضاء
- صورة الباسبور
- حجز فندق وهمى
- حجز طيران وهمى
- تامين صحى بالمدة اللى هتقضيها هناك
- كشف حساب بنكى لمدة 6 شهور
- وInvitation letter لو فيزا عمل ؛ و HR letter لو فيزا سياحة.
بعد ما تملى كل البيانات على الموقع هتحدد ميعاد فى السفارة و هيطلعلك فى الاخر Application Form الموقع بيعملها اوتوماتيك فيها كل بياناتك هتعملها Download و تاخدها معاك و انت رايح ميعاد السفارة و طبعا معاك كل الاوراق دى Hard Copy
فى السفارة ان شاء الله مش هتاخد اكتر من 15 دقيقة ياخد منك الاوراق و الفلوس ( هى كانت 470 جنيه قبل التعويم دلوقتى ب 60 دولار ) و يقولك تيجى تاخدها كمان 4 أيام بالكتير ان شاء الله .
الفيزا بتطلع لمدة 6 شهور
و ده لينك فيه شرح ازاى تملى البيانات على الموقع :-


اول ما تستلم التأشيرة ان شاء الله ؛ لازم تتطلع التصريح الأمنى من مجمع التحرير
التصريح الامنى بعد ما تاخد التأشيرة ؛ بتروح مجمع التحرير الدور التانى؛عند ظابط الاتصال ؛ بتسحب ورقة بيانات تملاها و اهم حاجة اسم الوالد رباعى و تاريخ ميلاده ؛ و بتقدمها مع صورة الباسبور و التاشيرة ؛ و يقولك تعالى استلمه كمان 3 أو 4 أيام.
نصيحة بلاش تأكد أى حجوزات الا لما تاخد التصريح الأمنى ؛ عشان ممكن تروح تستلمه يقولك مرفوض و على حسب السبب ، بيكون غالبا السبب تشابه أسماء و تضطر تلف لفة حلوة بتاع 20 يوم لحد ما تفك التشابه ده.
و كمان اللينك اللى فوق فى شرح للتصريح الأمنى بالتفصيل.
- رحلتى كانت 7 أيام فى شهر ديسمبر اللى فات حجزت الطيران و الفندق مع شركة سياحة هنا قبل السفر عشان ادفع فلوسهم بالجنيه و اوفر الدولار للرحلة :D وكمان حجزت معاهم رحلة لمدينة بورصا و دفعتها بالجنيه :)
- فى اسطنبول لو حبيت تتوه مش هتعرف لأن فيها شبكة مواصلات قوية جدا ؛ الترام و المترو كانوا بيوصلنى لأى حتة أنا عايزها و طبعا لازم تستخدم كارت اسطنبول و تشحنه ب 50 ليرة مثلا هيكفيك اسبوع ان شاء الله :)
- اهم برامج و Applications ممكن تستخدمها هناك هى Visit A City و Trip Advisor و دليل اسطنبولIstanbul Directory هتساعدك فى تنظيم الرحلة باليوم و مواعيد اللى المتاحف و القصور بتكون فاتحة فيها؛ و كمان اماكن المطاعم و الكافيهات و تروحها ازاى.
- الأكل هناك و همى ؛ خصوصا محلات الاوبن بوفيه و طبعا لازم تجربوا الكمبيرالتركى وتشربوا اللبن و السحلب :D
- الحلويات التركية هتفلسك خصوصا الحلقوم التركى و الكنافة على الفحم و البقلاوة :D
- اهم المعالم طبعا قصر توب كابى و نصيحة مش لازم جزء الحرملك؛ و جامع السلطان أحمد و متحف آيا صوفيا ؛ قصر دولما بهشة ؛ برج جالاطة ؛ الجراند بازار و السوق المصرى.
- لازم طبعا تروحوا شارع الاستقلال و ميدان تقسيم فى تقسيم ؛ منطقة Laleli و Sirkeci لشراء الهدايا و Eminounu لازم تاكلوا السمك هناك ;) و كوبرى جالاطة ؛ منطقة Ortakoy و جسر البوسفور.
- رحلة البوسفور ممتعة جدا لازم تاخدوها من ميناء Eminounu ب 12 ليرة.
- الحمام التركى يا جماعة :D و اشهر واحد اسمه شمبرلي تاش لدرجة ان محطة ترام متسميه على اسمه وهو غالى شوية بس برده لازم يا جماعة :D
- لازم رحلة لمدينة بورصا و طبعا كانت احلى تجربة ليا الوقت ده عشان كان فيه تلج و تزحلق على الجليد على جبل الاولداغ و تركب التليفريك ؛ بجد يوم كامل هناك ممتع و رائع
- بالنسبة لل Shopping فيه مولات كتير جدا اشهرها مول جواهر و مول سفير و مول Olivium و ده ارخص و احسن واحد فيهم بالنسبة للاسعار ده غير محلات شارع الاستقلال كتير جدا :D هتفلس برضه :D
- بالنسبة للسهر فاكتر منطقة هى تقسيم و خصوصا شارع الاستقلال و انا حجزت الفندق هناك عشان كده :D
- اسطنبول بجد مدينة اكتر من رائعة و مش غالية تقريبا تكلفة اسبوع معيشة ومزارات و رحلات حوالى من 1200 ل 1500 ليرة (تقريبا من 350 ل 450 دولار) شاملة كل حاجة :D
- الجو هناك كان ساقعة طبعا بس البلد نضيفة فعلا و حتى فى الشتاء ممتعة برضه :D
- برضه الحمام التركى لازم يا اخوانا :D
فى الاخر يارب يكون معلومات مفيدة و وواضحة و اللى محتاج اى استفسارات انا تحت أمره :)
16114027_10154970461997138_7822617438977429922_n.jpg

16142944_10154970449712138_2421460258585482918_n.jpg

16114852_10154970449897138_1359691782498867609_n.jpg

16114150_10154970451062138_5111822913668634953_n.jpg

16143014_10154970451732138_3551922840447923715_n.jpg

16195650_10154970452167138_8599492657771857437_n.jpg

16174559_10154970452252138_6555330834879875303_n.jpg

16142839_10154970452577138_1100398963958386470_n.jpg

16143286_10154970453397138_3328946429731360424_n.jpg

16114901_10154970453592138_4862876473249512049_n.jpg

16174658_10154970454002138_8331970359265322484_n.jpg

16114892_10154970454637138_1078465990446072693_n.jpg
 

R

Rawda Abd El Salam

عضو
للاسف ضيعت وقتي في المولات ولا لحقت الف البلد وجمالها و في اخر 7 اول 8 كانت حر الصراحه ..ان شاء الله نروح تاني
 
ف

فينوس هاروت

عضو
انا سمعت انا الحاجه هناك بتبقي هاي كوبي منين اشتري حاجات وابقي مطمنه انها اوريجنال وكمان اسعارها كويسه زي الملابس او نضارات او ساعات
 

المواضيع المشابهة


أعلى