استكمالا للسلسله حكتبلكم المره دى عن بلد انا لسه راجع منها و بصراحه انبهرت...

M

Mahmoud Samir Bedair

:: مسافر ::

استكمالا للسلسله حكتبلكم المره دى عن بلد انا لسه راجع منها و بصراحه انبهرت بيها

7 - المغرب

انا اكتشفت اننا كمصريين منعرفش حاجه عن المغرب,
منعرفش ان فى جوهرة سياحية فى القارة بتاعتنا الناحية التانيه بتطل على الاطلنتى
شعبها لو قلنا ان كلمة بيحبونا قليله مش بنبالغ هما بيحبوا المصريين جدا
الحياة و السفر فيها سهل جدا و التعامل معاهم سهل. بيفهموا لهجتنا كويس ممكن احنا منفهمش بعض الالفاظ من لهجتهم لكن مع مرور الوقت بنتعود عليها ولو انت بتتكم شوية فرنساوى زى العبد لله حتبقى سعيد الحظ.
طبيعتها جميله جدا و متنوعة ما بين شواطىء و جبال و طبيعه خضراء. ممكن تلاقى فى مكان واحد صحراء و تلج فى نفس الوقت مزيج عجيب عشان عندهم اعلى قمم سلسلة جبال اطلس (توبقال) تانى اعلى قمة فى افريقيا بعد كليمنجارو. غير طبعا ان الواحات و الصحراء عندهم جميله جدا و مهتمين بيها و بيتم تصوير افلام هوليوود فيها.

المغرب برضه بتتميز بتاريخ عريق ممتد من الامازيغ ثم الفتوحات الى سقوط الاندلس و بعد سقوط الاندلس, الفنون و الاثار بتاعتهم مميزه و جميله جدا و محافظين على الطابع المغربي الساحر فى كل مكان.

وللناس الطفسه اللى زيي اؤكدلهم انهم حينبسطوا اوى فى المغرب. المطبخ المغربي جميل و متنوع ومش حتلحقوا تخلصوا بس انواع الطاجين (الطواجن) اللى بيعملوها هناك.

ده خلى بلد زى مراكش بتنافس سنويا على اكتر الاماكن الجاذبه للسياح عالميا وفى سنة 2016 كانت الاختيار الاول للسياح على tripadvisor. وهى مناسبة لكافة انواع السياحه فى مغامرات و فى استرخاء و ممكن شهر العسل و سياحة الاثار و كل حاجه.

اللى حابب المغرب معتقدش انه ممكن يلفها كلها فى سفرية واحده دى عايزه شهر بحاله بس اهم الاماكن اللى لازم تشوفوها فى المغرب. و كلها الوصول ليها سهل جدا و مش مكلف اوى بالقطار او الاتوبيسات او العربيات المجهزه(طاكسي كبير).

كازابلانكا: البيضاء اكبر مدن المغرب بتتميز بطابع البناء الفرنسي. مدينة جميله و نظيفه على الاطلنتى اشهر معالمها وسط المدينة و سوق باب مراكش و الحبوص و شاطىء عين ذياب و موروكو مول و مسجد الحسن العملاق المطل على المحيط.

الرباط : العاصمة الاقتصادية مدينة حديثة و جميله جدا و قريبه من كازابلانكا.

فاس : تعتبر اقدم مدن المغرب و مقسومه جزأين فاس القديمة و فاس الحديثه, فاس القديمة فيها اسواق شعبيه مميزه جدا و بعض الاثار و المدارس و الجوامع القديمة الجميله.

افران : سويسرا المغرب, من انظف و اجمل مدن العالم. تحس فيها انك اتنقلت فجأه لاوروبا.ليها طابع مبانى اوروبي مميز و بتكون فى اجمل اوقاتها لما يغطيها الثلج. فيها غابات و بحيرات و شلالات رهيبه و طبيعه رائعه.

طنجه: عروس الشمال بتطل على المتوسط و مضيق جبل طارق. ليها طابع خاص بيها ومتاثره بقربها من اسبانيا فيها مدينة قديمة مدفون فيها ابن بطوطه و فيها شواطىء مميزه و جوها جميل جدا

شفشاون : المدينة الزرقاء. حاجه كده متتوصفش. تخيل مدينة كل حاجه حواليك لونها ازرق بدرجاته و على منجدر جبلى و حواليك شلالات و غابات خصوصا فى منطقة اقشور شوفوا صورها ممكن تفهموا قصدى.

مراكش: اهم المدن السياحية. مدينة اثرية مبانيها كلها احمر طوبى جميله و نظيفه فيها اثار كتير زى مدرسة بن يوسف و قبور السعديين و قصور و حدائق مميزه و اهم معالمها ساحةجامع الفناء اللى بالليل بتتحول حاجه تانيه خالص جنان مطلق طبول و موسيقي و استعراضات لا تنتهى ورائحة شواء جميل من كل اتجاه. و اسواق عامله زى المتاهات. تجربه جميله. وبعض الاعضاء لفتوا انتباهى لمنطقة اوريكا بالقرب من مراكش فيها شلالات و نهر جميل جدا.

الصويرة : مدينة عادية و جميله فى الجنوب على ساحل الاطلنتى , ممكن تكون اجمل جو فى المغرب فيها شط جميل و مدينة قديمة و بيكون فيها مهرجان سنوى للموسيقي مشهور جدا اسمه الكناوة

اغادير : شرم الشيخ بتاعت المغرب اظن الرسالة وصلت :D

ورزازات و مرزوجه : صحراء و سفارى مميزه
بنى ملال و شلالات اوزود: دى بقي شوفوا صورها لانها متتوصفش :D

احب اقولكم ان المغرب اجمل سفرية سافرتها لحد دلوقتى
اه اجمد من اوروبا :D
شوفوا الصور(حقوق الطبع محفوظة الخ)
16142816_10154711810101131_348282342574038439_n.jpg

16143050_10154711809936131_422412206858023745_n.jpg

15977363_10154711813911131_8002759026918008109_n.jpg

16105514_10154711810601131_5485759734207015962_n.jpg

15965768_10154711811251131_383457698422232161_n.jpg

16105728_10154711811171131_6740581691554725190_n.jpg

16142336_10154711813221131_3475224305277522960_n.jpg

16115035_10154711812521131_8313298118552360089_n.jpg

15873313_10154711813186131_1989440195133138537_n.jpg

15966234_10154711813896131_1789126281873095373_n.jpg

16143235_10154711813806131_8354944832202676082_n.jpg

16143216_10154711814386131_3812515112249588013_n.jpg
 
N

Nabila Hunny

:: مسافر ::
شكرا لشهادتك الرائعة!
و سعيدة أنك استمعت بالمغرب!
انت لفيت المغرب كله الظاهر!
طب بما أنك جيت للرباط "العاصمة الإدارية" للمملكة،كنت تتصل بي و أفسحك.

تمازيغت فين؟
تمازيغت هي لغة الأمازيغ و ليست منطقة.

هل تقصد "تاغازوت"؟

مهرجان "كناوة"
مش قناوة Gnaoua
هههه

ساحة "جامع الفنا" بنسميها كدة.

تقريرك رائع جدا!

مجهود تشكر عليه و لك مني تحية!
 
M

Moataz Abu Zeid

:: مسافر ::
هي المغرب حلوة بس مش واو،مقارنة ببلاد عربية مثلها ذي دبي او مصر مش في صالحها
 
B

Basem Bennis

:: مسافر ::
جميله جدا جدا والصور كمان تجنن ماشالله شوقتني اروحها واللهي
 
M

Mohammad Omran

:: مسافر ::
طيب مفيش كلمه شكر ولا إهداء خاص للى طلعك المغرب
 
M

Mohammad Omran

:: مسافر ::
الجو احسن من مصر .. الشمال زى طنجه مثلا زى القاهره دلوقتى و الجنوب زى اغادير زى الغردقه كدا و إفران جوها قريب من سانت كاترين كدا
 
M

Mohammad Omran

:: مسافر ::
مفيش مقارنه بين دبى و المغرب .. المغرب بلد تاريخى و الطبيعه و العماره مختلفه تماما عن الخليج كله
 
M

Mohamed Fathi

:: مسافر ::
بس ايه المدينة اللى بتجمع كل حاجة البحر والطبيعة والاثار والتاريخ والتسوق والسهر والخروج ؟
 
أعلى