#دليل_الرحالة_في_الهند الجزء الثالث والأخير...

Z

Ziyad Elgendy

عضو

#دليل_الرحالة_في_الهند الجزء الثالث والأخير
الجزء الأول: (معلومات عامة عن الهند)

الجزء التاني : (المواصلات - السكن -الأكل والشرب - وكمان الإتصالات والإنترنت)

الجزء الثالث : (المدن والأماكن اللي زرتها ومعلومات عامة عن الأماكن السياحية والأنشطة)
- الجزء ده هيكون جواب لأسئلة كتيرة (عامة) أتسالتها، زي إيه أحسن الأماكن؟ وهتكلفني الرحلة قد إيه؟ لأن الأسئلة ديه ملهاش جواب محدد وبتختلف من شخص للتاني.
- هيبقى مقسم على شكل فقرات:
1. أسبابك للسفر (ده جزء عام ممكن ينفع لأي بلد)
2. مواقع مفيدة للبحث عن أماكن وأنشطة
3. اقتراحات لحاجات ممكن تشتريها وأماكن بيعها
4. المدن الهندية اللي زرتها

---------------------------------------------------------------------------------------

- أنا بدأت السلسلة بأهم جزء اللي هو الأسباب اللي خلتني اختار الهند عشان أسافرها، وده اللي تقدر تبني عليه خططك كلها في أي بلد إنت بتفكر تسافرلها.
- هتكلم بشكل عام في الأول، الأهداف والأسباب اللي هتختار على أساسها البلد اللي هتسافرها وده بتعتمد في الأول والأخير عليك (طبعا مع قدرتك المالية والوقت اللي ممكن تقعده هناك)، طبعا مفيش مانع إنك تستفيد من خبرات وآراء الناس اللي سافرت بس خليك صاحب قرارك وليك نظرتك.
- للأسف اللي بشوفه أو بحسه (يا ريت يطلع غلط) إن ناس كتيرة رابطة السفر بمجرد إنك تركب الطيارة وتتصور كام صورة وتجرب آكلات جديدة وتحكي أغرب قصة شافتها في حياتها (كل واحد ليه وجهة نظر ولو السفر كده بيسعدك ويفرحك .. سافر)، وساعات كتيرة بحس إنه بقى موضة عشان بس تبين للناس إن إنت عندك القدرة تسافر.
- لو اشتركت في جروب للسفر للأجانب هتلاقي أسباب وأهداف كثيرة ممكن تلهمك ، وأنا شخصيا لما بقرأ بعض البوستات بحس إني مسفترش (مع كل اللي عملته) وبحس إني نزلت قضيت مشوار ورجعت البيت تاني 
- من الجمل اللي بحبها جدا عن السفر "Travel like a local not like a tourist" يعني "سافر زي أهل البلد مش زي السياح"، وده هيفرق كتير جدا في مدى استفادتك وانبساطك من سفرك وهتفضل دايما فاكر الرحلة.
- في أسباب عامة تخليك تسافر (في بوستات كتيرة اتكلمت عنها ولو حابين ممكن أكتب عنها بوست مفصل) لأي مكان في العالم، أهمهم إنك تتعلم من الناس اللي هتقابلهم وتعلمهم والمواقف اللي هتحصلك، إنت ممكن تتعرض لموقف أو تسمع قصة تأثر فيك وتغير حياتك وتبقى ديه أكثر حاجة استفدتها من رحلتك 
- التطوع :
للأسف كتير ناس بتربط التطوع بالمقابل المادي وللأسف ثقافة التطوع مش مؤمنين بيها، مع إننا ممكن بنعملها وإحنا مش واخدين بالنا، زي ما كتبت في النقطة اللي فاتت انت ممكن تتطوع في مكان وتتعرض لموقف يغير الطريقة اللي انت شايف بيها الدنيا، مثال بسيط (سؤال ممكن كل واحد فينا يسأله لنفسه) : ليه في ناس على الجروب بتتطوع وبتساعد الناس وتجاوبهم على أسئلتهم وتشاركهم تجربتهم؟ إيه المقابل اللي ممكن يأخدوه؟
2 × 1:
أنا سافرت الهند لمدة شهرين ونصف، اشتغلت في التطوع (ايسيك) لمدة شهر ونصف والشهر الباقي سافرت فيه الهند، وممكن تعتبرني إني سافرت مرتين، مرة اتطوعت ومرة سافرت سياحة، فترة التطوع خليتني استقر في مكان لفترة طويلة وده اللي خلاني أقدر أكون صداقات أقوى وأكتشف تفاصيل عن حياة الشعب الهندي وده كان صعب يتحقق لو أنت سافرت سياحة بس، وقدرت في الفترة ديه اشترك في مركز لليوجا.
- تحديد الأهداف هيديلك القوة والصبر إنك تكمل رحلتك للآخر مهما واجهتك مشاكل، أنا كتبت السلسلة ده عن تجربتي للهند بشكل عام مضطر أني أحكي عن جزئية معينة عن تطوعي مع أيسيك (مع الإحترام لكل الآراء المؤيدة أو المعارضة واللي حابب يسألني عن ايسيك ممكن يسألني على الخاص).
- أنا كنت عايز اتطوع في فرصة ليها علاقة بالهندسة بس للآسف ملقتش التخصص بتاعي وفي نفس الوقت مكنتش عايز اشتغل في مشروع متكرر كتير اللي هو تعليم الأطفال (بس ده ممنعش إني أدور على فرصة تخليني أتطوع وأدرس في فصول وفعلا لقيت فرصتين هتكلم عنهم في الفقرة التانية)، بعد ما دورت كتير لقيت فرصة عن التسويق مع مؤسسة تعليمية (بتنشر كتب للأطفال وبتساعد المعلمين وتأهلهم) وشفتها أنسب فرصة وكمان كانت المدينة اللي هتطوع فيها مناسبة ليا (أنا ناس كتير كانت تنصحني إنني أوسع دائرة معرفتي وأتطوع في مجال جديد بالنسبة ليا لأنك زي ما بتفيد الناس انت نفسك بتستفيد وتتعلم مجال جديد).
- الجزء المهم اللي حابب أركز عليه:
كان في الدعوة اللي قدمتها للسفارة برنامج تفصيلي عن فرصة التطوع (التسويق) اللي قدتمها والنشاطات اللي هعملها طول فترة التطوع (شهر ونصف)، كان معايا نسخة منها وبعد ما وصلت وعرفوني بالمؤسسة وبدأنا نشوف هشتغل إيه بالضبط ورتهم البرنامج اتفأجؤوا بيه ومكنوش يعرفوه عنه حاجة (ومكنش مناسب ليهم عشان يطبق نظرا لحجم ونوع المؤسسة)، ولما سألتهم إنهم المفروض عندهم خلفية عن البرنامج ويكون عندهم القدرة إنهم يكتبوا ويعدلوا البرنامج على موقع ايسيك قالولي للأسف لا.
- أنا كان معايا زميلي من سنغافورة اتطوع في نفس البرنامج وكل واحد فينا كان ليه ردة فعل بناء على هدفه وأولياته.
- هم كانوا ناس متفهمين ومحترمين وسألونا عايزين نشتغل في أنهي جزئية في التسويق.
- أنا للأسف كنت مهيأ نفسي على طريقة شغل معينة ولقيت إنها صعب تتنفذ فأكتفيت بتصميم بوسترات تتنشر على صفحتهم.
- زميلي السنغافوري بيدرس مجال العقارات والتسويق وكان جاي يتعلم التسويق عشان هيفيده في مجاله، ولما لقى الوضع كده دور على الشغل اللي ممكن يشتغله ويفيده كخبرة، وبدأ يعلم نفسه وكان دايما بيقولي (Google it) و فعلا درس السوق وعمل دراسة عن التسويق على السوشيال ميديا والناس اللي في المؤسسة استخدمت المعلومات اللي وصلها في خطة التسويق على الفيس، وعلى عكسي زميلي ما سافرش في الهند غير 3 أيام.
- اللي أنا بحاول أوصله أنت معرض لمواقف زي ده في أي وقت، ولو أنت محدد أهدافك صح ومؤمن بيها هتأقلم نفسك وهتلاقي طريقة توصل بيها لهدفك ، كل شخص ليه أهداف مختلفة عن التانيين متربطش نفسك بتجربة حد.
- حاول تعمل (عرض "Presentation" (أو صور عن بلدك وخليه معاك على الموبايل عشان لو حبيت تتكلم عن بلدك وتعرف الناس عليها.
- افتكر دايما إن كل مكان في الدنيا ليه جماله الخاص بيه، الفرق بيكون في نظرتك والطريقة اللي بتشوف بيها الأماكن.
---------------------------------------------------------------------------------------

# مواقع مفيدة للبحث عن أماكن وأنشطة :

1. Tripadvisor.com
- من مواقع السفر المشهورة اللي تقدر بيها تتعرف على الأماكن اللي ممكن تزورها في أي مدينة تحب تزورها، هتكتب اسم المدينة وهيطلعلك معلومات عامة عن المدينة والفنادق والمطاعم والأنشطة والأماكن اللي ممكن تزورها.
- نيجي لأهم جزء ممكن يفيدنا في الموقع اللي هو الأنشطة، الأنشطة هتبقى مقسمة في تصنيفات (زي المتاحف، المواقع التاريخية، المواقع الدينية، ... ) لو حبيت تركز على تصنيف معين، وممكن تستعرض الأماكن كلها في قائمة عامة على حسب شعبيتها وده هيساعدك تحدد بسهولة إيه أهم الأماكن.
- لو حبيت تعرف كل مكان بالتفصيل هتلاقي العنوان ورقم التليفون والموقع الإلكتروني ومواعيد العمل ومدة الزيارة المناسبة، وجزء مهم هيبقى تعليقات وصور الناس اللي زارت المكان.
- التعليقات تقدر تعرف منها معلومات أكتر وهتكون عملية وأدق أكتر من الموقع أو الجهة اللي بتشرف على المكان (لأن ساعات مبيحدثوش المعلومات)، لأن في حالات بعض الخدمات بتتعدل وممكن تتلغي مثلا بسبب قلة السياحة وانت كنت عامل حسابك إنها لسه موجودة وتفاجئ لما تروح هناك، وهتلاقي كمان تصنيفات للتعليقات، زي لو حابب تقرأ التعليقات بلغة معينة، تقرأ التعليقات بناء على الوقت اللي اتكتبت فيه في السنة (مثلا لو انت مسافر في الصيف، التعليقات اللي اتكتبت في الصيف ممكن تفيدك أكتر من أي وقت تاني في السنة)، ولو انت عايز تعرف أسوأ حاجة في المكان ممكن تقرأ التعليقات اللي واخدة أقل تقييم والعكس صحيح، وكمان لو حابب تعرف رأي ناس تشبهك في غرضك للسفر زي لو انت مسافر مع عيلة ومعاك أطفال وعايز تعرف المكان مهيأ للأطفال ولا لا.
- أهم جزء هو الخريطة، لأنك ممكن تحفظ الأماكن اللي عجبتك وعايز تروحها وخصوصا لو مدينة كبيرة، وتقدر من الخريطة تعرف قربهم وبعدهم عن بعض وعن المواصلات العامة فتقدر تخطط للانتقالات بينهم وتوفر وقت ومجهود وفلوس.

--------------------------------

2. wikitravel.org
- الموقع عبارة عن موسوعة للسفر، لو حابب تفاصيل أكثر عن بلد أو مدينة معينة (معلومات عامة - ازاي تسافر للبلد - المواصلات العامة - أفضل الأماكن فيها - الأنشطة والاحتفالات - التسوق - الأكل والشرب - حاجات ممكن تتعلمها - التحذيرات وازاي تقدر تأمن نفسك - العادات والتقاليد - الاتصالات وأرقام التليفون المهمة).
- في الصفحة الرئيسية (أخبار وتحذيرات - ايفينتات - صور - دليل سريع للغات – أكثر الوجهات سفرا).

--------------------------------

3. .clapglobal.com
.facebook.com/clapglobal
- ده من أجمل الخبرات ليا في الهند، هيوفرلك الفرصة إنك تزور مدرسة وتتكلم للطلاب عن بلدك ويديهم فرصة إنهم يسألوك.
- فكرة الموقع إنها حلقة وصل بين المسافرين والمدارس، عشان الإتنين يستفيدوا ومن هنا جه اسم الموقع لأن زي ما أحنا عارفين المثل الشعبي "إيد واحدة مبتسقفش".
# خطوات التسجيل :
هتدخل تعمل أكونت على الموقع وتملأ بيياناتك الشخصية (اللي هتساعد المدرسة إنها تتعرف عليك أكتر)، وبعدها تحدد المدينة اللي انت مسافرها (في أكثر من مدينة، وكمان متاحة في مدن في دول تانية) وتدور على فئة طلبة المدرسة (ابتدائي، إعدادي، ثانوي) اللي حابب تزورهم، هتلاقي معلومات عن كل مدرسة ومكانها وأرقام التواصل معاها، وهتحدد كمان الوقت اللي هتزور في المدينة.
- بعد التسجيل هيجيلك إيميل للناس المنظمة تتواصل معاك وتحدد معاك المدرسة والميعاد والتفاصيل بالضبط وهتابع معاك، وهيبعتلوك نظام اليوم هيمشي إزاي وإيه المطلوب منك تحضره (واعتمد أكثر على الإيميل لإني لما سجلت كان في مشاكل على الموقع وكان التواصل كله عن طريق الإيميل).
# الجصة (أو العرض اللي هتقدمه للطلبة) :
- هتروح على المدرسة قبلها بوقت مناسب وانت معاك عرض (Presentation) عن نفسك وعن بلدك (هيتبعتلك ملف PDF بألمعلومات والصور اللي ممكن تحطها في العرض).
- المدرسة هتدخلك على الفصل وتعرفك للطلبة وهيكون في شخص يصورك ويساعدك من Clap Global.
- بعد ما تخلص العرض، هيبقى فيه فقرة الأسئلة، وهي عبارة عن كورتين مكتوب عليهم أسئلة واحدة ليك والتانية للطلبة، وكل واحد من الطلبة هيختار سؤال ويسألهولك وانت كمان ليك الفرصة إنك تسألهم.
- ممكن تأخد أي حاجة ليها علاقة بمصر زي العلم والعملات المصرية.
- هيطلب من كل طالب إنه يكتبلك رسالة وهتأخدها كتذكار معاك، وكمان الدول اللي حابين حد من أهلها يزورهم.
- آخر حاجة هتتصور صورة مع الطلبة.
- بعد ما تطلع من الفصل ممكن تقابل مدير أو مديرة المدرسة وتشكرك ويقدملك هدية.
- لو انت حابب تكتب حاجة عن تجربتك أو حاجة مميزة حصلتك أو اتعملتها من التجربة وتتنشر على صفحتهم على الفيس.
- ده لينك لتجربتي والمقال اللي كتبته واتنشر على صفحتهم على الفيس (لو حبين تقرأوه).
goo.gl/pe9RW8
- ده من الحاجات اللي عجبتني وأتمنى إنها تتعمل في مصر، لأنها هتأهل طلبة المدارس في مصر إنهم يتقبلوا جنسيات وثقافات الدول التانية.

--------------------------------

4. couchsurfing.com
- الموقع ده من أكثر مواقع السفر المشهورة، ممكن تدخل على جروبات خاصة بالتطوع أو ببلد أو مدينة أو لو حد بينظم إيفينتات ثقافية وتسألهم أي سؤال يخطر على بالك وهتلاقي أهل البلد هم اللي بيجاوبوك، غير إنك ممكن تدور على حد يستضيفك ( مجرد معلومة، في بوستات تشرح الموضوع ده).
- أنا شخصيا لقيت فرصتين، (بس للأسف كانوا مجرد يوم واحد)، أولهم Clap Global ، والتانية روحت درست حصة كمبيوتر لأطفال مدرسة عشوائيات في مدينة Resikish.
- استفادتك من الموقع ده هتعتمد على صبرك إنك تدور على الفرصة المناسبة ليك وشطارتك تعرف إذا كانت مناسبة ليك ولا لا، وده ميمنعش إنك تبقى حذر وتسأل الناس اللي هتتطوع معاهم هتعمل إيه وهتسكن فين (لو هيوفروا مكان) وهيبقى نظام التطوع إيه، وتطلب منهم تشوف صور لماس اتطوعت معاهم ولو عرفت تتواصل معاهم يبقى أحسن وأضمن.

--------------------------------

5. Trekking & Hiking :
- دول موقعين ممكن تفيدكم (أنا لقيتها بس مستخدمتهمش وخلي بالك ممكن متعرفش تعمل Hiking بالذات بين شهر 7 وشهر 9 عشان موسم الأمطار "Monsoon" ) :
trekthehimalayas.com
indiahikes.com

--------------------------------

cleartrip.ae . 6
الموقع ده تقدر تحجز منه أنشطة بجانب المواصلات والفنادق (مجرتهوش).

---------------------------------------------------------------------------------------

# اقتراحات لحاجات ممكن تشتريها وأماكن بيعها:

1. الكتب الإنجليزية:
- لو مهتم بقراءة الكتب الإنجليزية (وبالذات الكتب والموسوعات الملونة) ممكن تستغل وجودك في الهند وتشتري الكتب من هناك لأنها متنوعة أكثر من المكتبات اللي موجودة في مصر وسعرها نسبيا أقل من مصر (وخصوصا قبل تعويم الجنيه).
- في الهند فروع لدور نشر أجنبية كتير زي Penguin India.
- أماكن بيع الكتب :
مكتبة OM Book Store : موجودة في مدن مختلفة.
- نيو دلهي : كل يوم أحد في دلهي القديمة قريب من (Jama Masjid) وديه شبيهة بسور الأزبكية في مصر.
- جوا Broadway Book Centre :

--------------------------------

2. تيشرتات عن الهند :
- في براند اسمه "Tantra" هتلاقيه في نيو دلهي ( Janpath Rd. Connaught Place ) ومومباي وأسعارها بتبدي من 500 روبية (tantratshirts.com).
- تيشرتات عن جبال الهمالايا والتبت هتلاقيها في مدينة دارمشالا.

--------------------------------

3. amazon.in :
- ده تابع لموقع أمازون بس متخصص للبيع في الهند، وممكن تلاقي حاجات كتيرة عليه مفيدة لو انت من الناس اللي بتشتري أونلاين.
- ده ممكن يبقى مفيد لو انت تقدر تشتري أونلاين وقاعد في مكان ثابت لفترة تلحق تخليهم يشحنولك الحاجة اللي هتشتريها.

--------------------------------

4. التذكارات والسيفونير :
- انت هتكتشف بنفسك إيه اللي ممكن يناسبك، وفي كل مدينة هكتب إيه الأماكن اللي بتبيعها على حسب المدينة.

---------------------------------------------------------------------------------------

# المدن الهندية اللي زرتها :
- في الفقرة ديه هتكلم عن المدن اللي زرتها باختصار وبعض الترشيحات للأماكن اللي ممكن تتزار (مرتبهم من الأفضل للأقل من حسب وجهة نظري واهتمامي) كتبتهم بالإنجليزي عشان لو حبيت تعرف مكانهم ومعلومات أكثر عنهم، في أماكن تانية ممكن تتراح أنا مكتبتهاش (بالذات المدن الكبيرة) تقدر تدور عليها زي ما وضحت في الفقرة اللي فاتت.
- كتبت أغلب أسعار المزارات والهوستيل عشان يبقى موضوع التخطيط المالي للرحلة سهل، وفي أماكن كتير تذكرة الدخول فيها ب 500 روبية ولو إنت مش مختار الأماكن اللي إنت مهتم بيها ممكن تلاقي نفسك مش قادر تزور أماكن تانية، وحاول تقرأ وتعرف أكثر عن كل مكان بتفكر تزوره عشان متضيعش فلوس على مكان وأنت مش عارف إنت دخلته ليه.
- المدن ده مجرد أمثلة هتلاقي مدن كتيرة حلوة في الهند ومش شرط تزور كل المدن أو تقرأ عنها، عشان الموضوع يبقى أسهل كتبت أشهر الحاجات في كل مدينة وأنت تختار على حسب هدفك من السفر.
- الناس اللي هتسافر للسياحة هتسمع عن المثلث الذهبي واللي مقصود بيه 3 مدن: نيودلهي - أجرا - جايبور.
- - الهند من أكبر الدول من حيث عدد السكان وفي نفس الوقت مساحتها صغيرة بالنسبة لعدد السكان الكبير ، هتلاقي مدن كبيرة موجودة في أماكن مختلفة من الهند، وهتلاقي مدن صغيرة فيها أجمل الأماكن اللي ممكن تزورها في حياتك.
- مومباي ونيودلهي من المدن اللي غالية وممكن يبقى صعب تستخدم المواصلات العامة وهتزهق منهم لو هتقعد فترة طويلة (بالذات لو انت رايح تتطوع هناك)، ممكن تختار أي مدينة كبيرة في الهند، أنا اخترت بهوبال (المدينة اللي اتطوعت فيها) عشان موجودة في وسط الهند ومن المدن الرخيصة.
- لو انت مهتم بالأنشطة الثقافية والفنية نيودلهي ومومباي هتكون اختيارات مناسبة.
--------------------------------
- ده فيديو عملته عن رحلتي في أغلب الأماكن اللي زرتها (الفيديو في اليوتيوب مكتوب فيه أسماء الأماكن والمدن اللي زرتها وكمان ترجمة الأغنية الهندية :) )
- ده ألبوم صور لأماكن مختلفة في الهند


--------------------------------
أهم الحاجات المشهورة بيها المدن اللي زرتها :
1. دارمشالا : Dharamshala - الطبيعة الجبلية ،Hiking، المعابد البوذية
2. كوتشي : Kochin or Kochi - الـ Back Water
3. جوا : Goa - الشواطئ
4. نيو دلهي : New Delhi - المزارات التاريخية، المراكز الثقافية
5. جايبور : Jaipur - المزارات التاريخية، القصور والقلاع
6. أجرا : Agra - المزارات التاريخية
7. مومباي : Mumbai - المزارات التاريخية، المراكز الثقافية
8. بهوبال : Bhopal - مدينة عادية (مفيش حاجة عامة مميزة لها(
9. هاريدوار : Haridwar - المعابد الهندوسية
10. ريشيكش : Rishikesh: اليوجا، Hiking
--------------------------------
1. دارمشالا Dharamshala :
- مدينة موجودة على جبال الهملايا مشهورة بجمالها الطبيعي ورحلات ال Hiking وكمان مشهورة بشعب التبت واللي ساكن فيها "الدلاي لاما" (زعيم ديني) (500 كم من نيودلهي).
- للأسف ملهاش قطار ولازم تركب أتوبيس من محطة باص اسمها Kashmiri Gate ISBT.
- بعد ما توصل محطة الأتوبيس في Dharamshala هتركب عربية ل Mcleod Ganj.
- الفندق (500 روبية / اليوم غرفة لشخصين) Kailwood Guesthouse.
- أهم المزارات:
1. Bhagsu Waterfall (شلال)
2. Dal Lake (بحيرة)
3. Hiking
4. Tsuglagkhang Complex (معبد بوذي) من أجمل وأكبر المعابد اللي زرتها.
5. Kalachakra Temple (معبد بوذي)
6. Tibetan Museum‬ (متحف)
7. Curch In Wild (كنيسة)

--------------------------------

2. كوتشي (Kochin (Kochi :
- مدينة موجودة في جنوب غرب الهند مشهورة ب Back Water وهي عبارة عن قنوات مائية متصلة بالبحر (850 كم جنوب جوا).
- محطة القطار الرئيسية : (Ernakulam Junction (Ernakulam South
- الهوستيل : ( 450 روبية / اليوم شامل الفطار ) Happy Camper
- أهم المزارات:
1. Back Water : أهم مكان في كوتشي (وفي الهند) والناس بتسافر كوتشي عشان تزورها، الرحلة بتبقى مدتها 6 ساعات في المركب اللي بيتحرك جوة القنوات المائية وفي فرصة إنك تتعرف على السكان المحليين وتأكل وجبة غداء (الأسعار ممكن تبقى متفاوتة بس أنا حجزت مع الهوستيل ب 1000 روبية والمواصلات من باب الهوستيل والسعر كان أحسن بكتير من أماكن تانية بره).
2. Kerala Kathakali Centre (مركز ثقافي) ممكن تتعرف وتتعلم عن الثقافة اللي موجودة في المنطقة (لو انت عندك وقت كافي)، بس متفوتش عرض الرقصة المحلية (Kathakali Dance) بـ (300 روبية)
3. Jew Town (المدينة اليهودية) كوتشي من المناطق اللي فيها تواجد لليهود وموجود فيها معبد يهودي، المنطقة ده فيها أماكن لشراء التذكارات والأنتيكات.
4. Fort Kochi Beach + Chinese Fishing Nets (شاطئ بس مش للسباحة) بيقبى جميل بالليل.
5. Mattancherry Palace (متحف) (5 روبية).
6. SNC Maritime Museum (متحف بحري) (40 روبية).
7. Jewish Synagogue (معبد يهودي) (5 روبية).
8. Santa Cruz Cathedral Basilica (بازيليكا (كنيسة))
9. Kerala Folklore Museum : (متحف بإدارة خاص)مش بنصح بيه لو انت معندكش وقت لإنك محتاج إنك تركبله مواصلة وهتلاقيه عشوائي وغير إن سعر التذكرة أغلى من الأماكن التانية (200 روبية).

--------------------------------

3. جوا Goa :
- ولاية هندية مشهورة بشواطئها موجودة في الغرب على بحر العرب (جنوب مومباي 750 كم)
- محطة القطار الرئيسية : Madgaon
- الهوستيل : (300 روبية / اليوم)Backpacker Panda Goa
- الهوستيل موجود في منطقة اسمها Candolim وعشان توصلها محتاج تركب 3 أتوبيسات :
1. Madgaon > Margao Bus Terminal
2. Margao Bus Terminal > Panjim Bus Stand
3. Panjim Bus Stand > Candolim
- ممكن تأجر سكوتر (فيسبا) في (250 روبية / اليوم) وتستكشف المنطقة المحيطة.
- أهم المزارات:
1. الشواطئ (بتكون عامة بدون أي رسوم) ولو أنت رحت في أول شهر 9 (سبتمبر) مش هتعرف تنزل البحر.
2. Aguada Fort : (أثر تاريخي) (Free).
3. Light House : منارة وممكن تطلع جوة المنارة (25 روبية).

--------------------------------

4. نيو دلهي New Delhi :
- نقدر نشبها بالقاهرة من حيث عدد الأماكن التاريخية والمتاحف اللي موجودة فيها والمراكز والأنشطة الثقافية،من أجمل المدن اللي زرتها واللي هيكون صعب أرتب فيها الأماكن، ده غير إن فيها حاجات كتير ممكن تكتشفها.
- محطة القطار الرئيسية: New Delhi.
- الهوستيل:
- أحسن منطقة تدور فيها جنب محطة قطار New Delhi وهيبقى أفضلك لو حجزت في هوستيل أو فندق مكيف لأن نيو دلهي حر جدا والمدينة الوحيدة اللي زرتها ومكنش فيها مطر.
- أهم المزارات:
1. Humayun Tomb (مقبرة وأثر تاريخي) (500 روبية)
2. Agrasen ki Baoli (بئر مية) (Free)
3. Qutab Minar (أثر تاريخي) (500 روبية) مشهورة باندماج العمارة الإسلامية والهندوسية مع بعض.
4. Red Fort (قلعة) (500 روبية)
5. Connaught Place (ميدان) المنطقة شبيهة بميدان التحريرومنطقة وسط البلد، هتلاقي فيها محلات ومكاتب وحديقة، ويوم الأحد بيتقفل قدام العربيات وبيبقى في أنشطة كتيرة.
6. Old Delhi : مشهورة بأسواقها الشعبية، المنطقة أغلب سكانها مسلمين، وممكن تكتشفها على رجليك.
7. Hauz Khas : (أثر تاريخي) (Free).
8. National Gallery of Modern Art (متحف فن) (500 روبية)
9. National Science Museum (متحف علوم) (40 روبية)
10. National Railway Museum (متحف خاص بالقطارات) (20 روبية)
11. Metro Museum (متحف خاص المترو) (Free) داخل محطة مترو (Patel Chowk station)
12. National Philatelic Museum (متحف للطوابع)
13. Nehru Memorial Museum (متحف لجواهر لال نهرو أول رئيس وزراء هندي).
14. Indira Gandhi Memorial Museum (متحف لأنديرا غاندي بنت جواهر لال وكانت رئيسة وزراء للهند ومطار نيودلهي متسمى باسمها).
15. المعارض الفنية في نيو دلهي.
16. India Gate: (نصب تذكاري) (Free).
17. Parliament Of India (مبنى البرلمان الهندي).
18. Jantar Mantar (أثر تاريخي وفلكي) لو انت مسافر جايبور هيبقى اللي في جايبور أفضل وأكبر.
19. Akshardham Temple (معبد هندوسي) من أجمل المعابد اللي زرتها وخصوصا من الداخل وعلى جدرانه من بره منحوتات عن الفيلة، وموجود جواه عرض فيديو (الدخول بالموبايل والكاميرا ممنوع وبتسيبهم في الأمانات).
20. Lotus Temple (معبد بهائي)
21. Jama Masjid (جامع) ممكن تشتري تذكرة وتطلع تشوف دلهي القديمة من المئذنة.
22. Gurudwara Bangla Sahib (معبد سيخي) ده من أكبر المعابد السيخية وموجود جواه متحف (ممكن ناس كتيرة متحبوش لأنه بيتكلم عن العلاقة الغير ودودة بين المسلمين والسيخ)، وأنت داخل المعبد السيخي بتسلم حذائك في الأمانات ولازم تلبس غطاء على الرأس وتغسل إيديك ورجليك (زي الوضوء).
23. Gurudwara Sisganj Sahib (معبد سيخي).

- الأسواق اللي ممكن تشتري منها التذكارات والملابس في نيودلهي:
1. Main Bazar : أحسن مكان بالنسبة ليا وأرخصهم، قريب من محطة نيو دلهي.
2. Dilli Haat : ليه رسوم دخول للأجانب 100 روبية!
3. Chandni Chowk : صعب تلاقي تذكارات وانتيكات في السوق ده بس مشهور بمحلات بيع الساري (الزي القومي للهنديات) وممكن تتمشى على رجليك بس خلي بالك من السرقة أو تتوه في الحواري الضيقة هتحس فعلا إنك روحت الهند :)

--------------------------------

5. جايبور Jaipur :
- معروفة باسم المدينة الوردية (Pink City) ومشهورة بقصورها وقلاعها وعمارتها وصناعة النسيج.
- محطة القطار الرئيسية : Jaipur Junction
- الهوستيل (250 روبية / اليوم) BackPack Panda
- ممكن تشتري في جايبور تذكرة مجمعة تقدر تزور بيها 7 أماكن لمدة يومين (1000 روبية - 200 روبية لو أنت طالب)
- المزارات السبعة (Amber Fort - Jantar Mantar - Albert Hall Museum - Nahargarh Fort - Hawa Mahal - Isarlat - Vidyadhar Ka Bagh - Sisodia Rani Ka Bagh)
- عشان تقدر تزور أكبر عدد من المزارات لازم تركز كل يوم في منطقة لأن جايبور فيها أماكن كتير تتزار وفي أماكن بعيدة عن بعض.
- أهم المزارات:
1. Panna Meena ka Kund (بئر وخزان مية) (Free)
2. Amber Fort (قلعة)
3. Jaigarh Fort (قلعة خاصة) بتطلعلها من Amber Fort ـ (45 روبية)
4. Albert Hall Museum (متحف)
5. Isarlat (برج) ممكن تشوف جايبور منه.
6. Jantar Mantar (أثر تاريخي وفلكي) موجود في 5 مدن في الهند، ده أكبرهم وأحسنهم، عبارة عن مكان لقياسات الفلك.
7. Hawa Mahal (قصر)
8. Nahargarh Fort (قلعة)
9. Anokhi Musuem (متحف خاص) مهتم بصناعة النسيج.
10. City Palace (قصر خاص) ممكن تسأل على تذاكر الدخول.
11. Jal Mahal (قصر) هتقدر تشوفه من بره البحيرة بس.
12. Elephant Village (قرية الفيلة) تقدر تركب الفيل هنا، الأسعار متفاوتة وركز وأنت بتتفق على العدد والمدة.
13. Galta Ji Temple (معبد)
14. Hanuman Temple (معبد)
15. Sisodia Rani Ka Bagh (حديقة)
16. Vidyadhar Ka Bagh(حديقة)

--------------------------------

6. أجرا Agra :
- أجرا مش بعيدة عن نيودلهي (3 ساعات بالباص) ممكن تحجز في رحلة من نيودلهي وترجعك في نفس اليوم وبريحك من التنقلات جوة أجرا (مش هتكون مناسبة لو انت عايز تقضي وقت طويل في تاج محل).
- أهم المزارات:
1. Taj Mahal (أثر تاريخي) (1000 روبية) خلي بالك لو انت رايح مع نفسك إنه بيبقى مقفول يوم الجمعة.
2. Agra Fort (أثر تاريخي) (500 روبية) تقدر تشوف منه تاج محل.

--------------------------------

7. مومباي Mumbai :
- أنا لحد دلوقتي مش عارف ليه ناس كتيرة بتحبها، بالعكس ملقتش فيها أماكن كتير تتزار.
- معلومة مهمة عن مومباي (بتأثر على المواصلات العامة): أغلب المكاتب موجودة في جنوب مومباي وأغلب الناس ساكنة في شمال مومباي.
- محطات القطار الرئيسية :
1. Chhatrapati Shivaji Terminus :CST
2. Lokmanya Tilak : من أقرب المحطات لمطار مومباي.
- الهوستيل :
- أنسب مكان للهوستيل قرب محطة (CST) في جنوب مومباي عشان بتبقى قريب من أغلب الأماكن والمزارات السياحية ومن المواصلات العامة.
1. Hotel Windsor ـ (600 روبية / اليوم)
2. Travellers Inn Fort
- أهم المزارات:
1. جنوب مومباي : من أجمل وأنظف الأحياء في مومباي واللي ممكن تستكشفها بنفسك، مشهورة بطراز العمارة الإنجليزية والمباني الفيكتورية (فترة الإحتلال البريطاني) زي مبنى CST.
2. Elephanta Caves (كهوف تاريخية ودينية) (500 روبية) موجودة على جزيرة ومحتاج تركبلها عبارة (180 روبية) من قدام Gateway Of India وهديلك فرصة تشوف مومباي من البحر، الكهف كان بيستخدم كمعبد هندوسي.
3. Sanjay Gandhi National Park (متنزه قومي) (44 روبية) في أكثر من نشاط ممكن تعمله، ممكن تطلع سفاري أو تأجر عجلة أو تدخل لمجموعة كهوف شبيهة بـ Elephanta Caves.
4. Prince of Wales Museum (متحف) (500 روبية - لو طالب ب50 روبية).
5. Gandhi Museum (متحف) (Free) متحف غاندي وده البيت اللي قعد فيه فترة.
6. المعارض الفنية في مومباي.
7. Chor Bazaar (سوق) هتلاقي فيه أنتيكات وتذكرات قديمة (في الغالب هتروح تتفرج بس).
8. Worli Sea Face (كورنيش البحر).
9. Dhobi Ghat : بيقال إنها أكبر مغسلة في آسيا.
10. Gateway Of India (أثر تاريخي) شبيه بـ India Gate في نيودلهي.
11. Haji Ali Dargah (جامع)

--------------------------------

8. بهوبال Bhopal :
- ده المدينة اللي قضيت فيها فترة تطوعي، واختارتها لأنها من المدن الرخيصة وموقعها في نصف الهند فالسفر منها أو إليها هيبىقى أسهل.
- المدينة عاصمة ولاية ماديا براديش.
- المدينة مفيهاش أماكن كتيرة تتزار وأماكن كتير موجودة بره المدينة ومحتاجة خدمة Uber.
- المدينة مشهورة باسم (City of the Lakes) بسبب البحيرات اللي موجودة فيها.
- محطات القطار الرئيسية :
1. Bhopal Junction
2. Habibganj station
- أهم المزارات:
1. Bhimbetka Rock Shelters : ( كهوف تاريخية) من مواقع اليونسكو للتراث العالمي وعبارة عن مجموعة كهوف وملاجئ من العصر الحجري (Free) .
2. Great Stupa at Sanchi :(أثر تاريخي وديني) مبنى على شكل قبة وعبارة عن مدفن (للرماد) في الديانة البوذية (500 روبية) .
3. Upper Lake : أكبر بحيرة في مدينة بهوبال وتعتبر مكان للتنزه.
4. Van Vihar : حديقة حيوان (الحيوانات موجودة داخل أماكن مسورة) تقدر تدخلها بالعربية أو تأجر عجلة (122 روبية).
5. Bharat Bhavan : (معرض فني) (20 روبية).
6. Remember Bhopal Museum : (متحف) عن مأساة مصنع المبيدات في بوبال (عام 1984).
7. Taj El Masjid : من أكبر الجوامع اللي موجودة في آسيا (على حسب معلوماتهم).

--------------------------------

9. هاريدوار Haridwar :
- مدينة دينية مقدسة للهندوس وبيسافرولها عشان معابدها المشهورة (ممكن تزورها لو انت في طريقك لمدينة ريشيكش)، المدينة من أفقر المدن اللي زرتها وممكن ناس كتيرة متستريحش فيها (250 كم من نيودلهي).
- محطة القطار الرئيسية : Haridwar Junction
- أهم المزارات : المعابد الهندوسية على نهر جانجا (Ganga)

--------------------------------

10. ريشيكش Rishikesh:
- المدينة مشهورة بأنها مركز لليوجا و ال Hiking ـ (27 كم من هاريدوار) .
- أحسن وسيلة مواصلات من هاريدوار الأتوبيس والرحلة بتبقى ساعة تقريبا (فيه قطار بس مش عملي).
- أهم المزارات:
1. مراكز اليوجا.
2. Hiking
3. المعابد الهندوسية.

---------------------------------------------------------------------------------------
- كده وصلت لنهاية سلسلة "دليل الرحالة في الهند" أتمنى تكون عجبتكم وتبقى مفيد ليكم.
- لو شايفين إن فيه حاجة ناقصة قولولي وممكن أتكلم عنها :)
Wv8Ky8dgBYS9h99NSXvKFFEuBaRDhgse.jpeg

Wv8Ky8dgBYS9h99NSXvKFFEuBaRDhgse.jpeg

Wv8Ky8dgBYS9h99NSXvKFFEuBaRDhgse.jpeg

Wv8Ky8dgBYS9h99NSXvKFFEuBaRDhgse.jpeg

Wv8Ky8dgBYS9h99NSXvKFFEuBaRDhgse.jpeg

Wv8Ky8dgBYS9h99NSXvKFFEuBaRDhgse.jpeg

Wv8Ky8dgBYS9h99NSXvKFFEuBaRDhgse.jpeg

Wv8Ky8dgBYS9h99NSXvKFFEuBaRDhgse.jpeg

Wv8Ky8dgBYS9h99NSXvKFFEuBaRDhgse.jpeg

Wv8Ky8dgBYS9h99NSXvKFFEuBaRDhgse.jpeg

Wv8Ky8dgBYS9h99NSXvKFFEuBaRDhgse.jpeg

Wv8Ky8dgBYS9h99NSXvKFFEuBaRDhgse.jpeg
 

F

Fady Adel

عضو
Sayed اقرا الكلام دة اكيد هتستفيد
و متنساش تقرا الجزء الاول و التاني
 

المواضيع المشابهة


أعلى