دليلك الكامل لمرسى علم اللى مسافرش المنطقة...

A

Ahmed Elsharkawy

عضو

دليلك الكامل لمرسى علم

اللى مسافرش المنطقة دى فايتة كتير اوى
مرسى علم يعنى الأستجمام والنقاء والرحلات اللى مفيهاش دوشة

البداية مع المواصلات اللى بتتلخص فى الاوتوبيسات واللى بتبقى موجودة بميعاد واحد اللى هو 12 الاربع بليل من التحرير وفى واحد تانى بعديه أغلى شوية 130 ، 165 بس علشان المواعيد قليلة فبتلاقيها مليانه حاول تحجز قبل سفريتك ب3 أيام ع الأقل ( مدة الرحلة بالاتوبيس حوالى 9 ساعات فالافضل أقامتك متقلش عن 4 ليالى علشان المشوار ده )

بالنسبة للفنادق فالموضوع هناك مش هيختلف كتير معظم الفنادق كويسة جدا ( بنجهزلكم بوست عن الفنادق ) وانت مش هيبقى عندك وقت للقعاد فى الفندق . بالبرنامج اللى هنقولك علية دة

أنت لو رايح أستجمام أو شهر عسل وهتقعد فى الفندق وبس فمرسى علم من أفضل الاماكن اللى هتلاقى فيها الجو ده ..لكن لو أنت عاوز رحلات ومغامرات وحاجات ومناظر جديدة فركز فى اللى جاى بقى

أول حاجة لازم تعملها أنك تزور القلعان ودى حوالى 65 كيلو من مرسى علم دى بقى شجرة كدة فى وسط المياة فى منطقة حنكوراب ويفضل زيارتها قبل المغرب بساعتين علشان تستحمل الشمس وتستمتع بالمنظر الموجود ( الشجرة محاطة بحبال فمتتخطاش الحبال دى بعد أذنك )

أنت فى المكان ده كدة تبقى واقف فى المكان اللى يعتبر من أجمل وأفضل 20 شاطئ حول العالم ..عارف سمكة نيمو بتاعت الكارتون دى هتلاقيها هناك كتير اوى وسط الشعاب المرجانية ( حافظ على كل حاجة هناك لان دى محمية طبيعية تتبع محمية وادى الجمال ) يعنى حافظ على الشعاب المرجانية ..
اليوم التانى بقى ممكن تروح تجرب تنزل المياه فى منطقة النيزك ودى الأسطور بتقول أن الحتة دى نزل فيها نيزك فعمل التشكيل الشاطئى اللى موجود ده ..المنطقة دى صعب اى حد يوصلها الا اللى عارفها فحاول وانت فى الفندق تسأل الناس عليها لانها مش ع الطريق علطول وبتتمشالها شوية حلوين جوة مدق صغير كدة ..

أخيرا بقى اليوم التالت ممكن تجرب شاطئ مرسى مبارك ( هو أسمة كدة ملناش دعوة ) ودى أنت بتروحها عن طريق لنش ولما توصل الشاطئ دة هتشوف ال الدوجونج ودة بيتسمى فيل البحر او عجل البحر وهتشوفة قريب منك عادى جدا ( على فكرة هو ضخم جدا عكس ما أنت بتتخيلة فى الصور ) ..حاجة مسالمة بس متلمسوش وكمان هتشوف سلاحف كتيير جدا
أنت بعد كل يوم من اللى هتشوفة وهتعملة ( الموضوع فيه مجهود ) هترجع مش قادر بس لو حابب النزول بليل مش هتلاقى حاجة فى مرسى علم ممكن تطلع على بورت غالب بتاكسيات عادى ( التاكسى هناك عربيات ربع نقل ) والمسافة مش كبيرة أوى .
منقووووول
A-T7p8oHN6qWBz0wTnOJp0pVYQG87Xa5.jpeg

A-T7p8oHN6qWBz0wTnOJp0pVYQG87Xa5.jpeg

A-T7p8oHN6qWBz0wTnOJp0pVYQG87Xa5.jpeg

A-T7p8oHN6qWBz0wTnOJp0pVYQG87Xa5.jpeg

A-T7p8oHN6qWBz0wTnOJp0pVYQG87Xa5.jpeg
 

A

Ahmed Morsy

عضو
مع كامل الاحترام لحضرتك

بس كلمني عن معاملة المصري

كلمني عن فرق السعر لصالح الأجنبي

خليهم يشبعوا بيها
 
M

Mohamed Hussein

عضو
نقول تاني اولا القلعان مكان و حنكوراب مكان تاني الشجرة دي في منطقة القلعان ثانيا الرحلة بتكون المكانين و ممكن تحط معاهم النيزك لانهم في نفس الطريق ثالثا ياريت تسيبو مرسى علم نضيفة وما تبقاش مصير شرم و الغردقة و في الطريق دهب للاسف
 

أعلى أسفل