• لأن اعضاء المسافرون العرب هم القيمة الاكبر بالنسبة لنا فقد قررت ادارة الموقع وقف كافة الاعلانات لكل الاعضاء

نصائح قبل السفر لتايلاند

M

Mina Gamil

Original poster
نصائح خلى بالك منها قبل السفر لتايلاند
تايلاند من البلاد الجميلة تتميز بالشواطئ الزرقاء الصافية، والغابات الكثيفة الرائعة، على الرغم من أن بيزورها عدد كبير جدا من السياح إلا انها مازالت محتفظة بهويتها وثقافتها الفريدة وشهرتها بإبتسامة شعبها، لو أول مرة تزورها دي شوية نصائح خلى بالك منها :

• مطارات بانكوك : خلي بالك في بانكوك فيه مطارين : مطار سورانابومي و ده الدولي و مطار دون موانج و ده يبعد عن مطار سورانابومي حوالي 50 دقيقه بالسياره .بعض من شركات الطيران المنخفض التكاليف بتطلع من دون موانج.
• خطط كويس لرحلتك قبل السفر، تايلاند بلد كبيره كلها شواطئ وجزر خلابه وكتير حدد من الاول حابب تزور ايه حسب فترة رحلتك.
• احرص على تلقى التطعيمات للإلتهاب الكبدى B قبل السفر وخد كل الادوية اللى هتحتاجها معاك ، وكمان مضاد للبعوض "الناموس" معاك دايما زى اسبراي OFF.
• وانت بتحجز الاوتيل ركز كويس مع موقعه، في اوتيلات بتبقي سعرها رخيص بس بعيدة جدا عن كل حاجة فهتلاقي نفسك بتدفع فلوس كتير جدا فى المواصلات.
• أتاكد إن الاوتيل اللي بتحجزة يكون مكيف، لان في اوتيلات كتير رخيصة بس بمراوح، التكييف أساسي لان الجو حر جدا.
• الفطار التايلاندى ملوكي ، لكن لو مش فارق معاك الفطار او مش بتحب تصحي بدري احجز اوتيل من غير فطار هيفرق معاك كتير، بس لو معاك اطفال احجز بالفطارأفضل.
• بعض الاوتيلات بتقدم خدمة نقل النزلاء بعربيات الي أقرب شاطئ بمواعيد معينة، اسأل واعرف المواعيد.
• حط الفلوس والباسبورات في خزنة الاوتيل، عشان لو وقع منك حاجة او اتسرقت يبقي الفلوس والاوراق في أمان، وخد معاك الفلوس اللي هتكفيك اليوم ، ماحدش هيوقفك في الشارع ويقولك بطاقتك او باسبورك. ولو حصل ولونه مستحيل بكل بساطة هتقوله في الاوتيل وساعتها هيجي معاك الاوتيل عشان تجيبه.
• مكاتب الصرافة في نفس الشارع بتختلف في السعر من مكتب للتانى، متغيرش من أول مكتب تشوفه.
• تايلاند بلد الفصال، لما تفاصل فاصل كتير عشان توصل للنص في الاخر، مثلا لو سالت علي حاجة و قالك 100 بات قوله 30 عشان في الاخر تاخدها ب 50.
• اتقل عشان تأخد أرخص سعر، لو حاجة عجبتك عند محل ماتشتريهاش، استني في كذا محل تاني بيبيعوها.
• خد معاك كروت فيها بيانات الاوتيل لو حصل أي حاجة توقف تاكسي وتديله الكارت هيوصلك الاوتيل وهناك تتصرف.
• ماتحجزش تاكسي ولا رحلة من الاوتيل، لان الاوتيل بيبقي حاطط سعر غالي جدا.
• هتحتاج خط تليفون عليه انترنت، عشان هتتصل بشركات سياحة وهتكلم سواقين وهتستخدم الانترنت وتشغل ال جي بي اس، في خطوط موبايل مخصصة للسياح هتلاقيها في 711 و Family Mart.
• اوبر Uber موجود في تايلاند، استخدمه في المشاوير الطويلة.
• وأنت بتزور المعابد فى تايلاند لازم تكون لابس لبس محتشم ويفضل الأبيض، البنات يفضل لبس بانطلون أو جيب طويله.
• جرب الأكل إللى فى الشوارع عدد كبير من الاصناف المتنوعة لازم تجربها.
_hMlQo3Jt_8mP9hsDu2xFJ3PpRNy9Bj5.jpeg
 
C

Christeen Tharwat Shafik

Original poster
مرسي جدا جدا عل المعلومات بس معلش مش فاهمه موضوع خط الموبيل اجيبه منين بالظبط
 
Y

Youssef Elrefaey

Original poster
انا كنت هسافر فى شهر 9 لكن قرأت ان الجو هناك بيبقى ممطر جدا فى الوقت ده ومش هعرف اتحرك حقيقى الكلام ده
 
A

Amy Mohammed

Original poster
اهم حاجه نخلى بالنا منها موسم الامطار عشان انا لما روحت كذا رحله اتلغت بسبب الجو.
بس بجد رائعه❤
 
D

Deyaa Eldin Mohammed

Original poster
معلش انا مسافر بعد 4 ايام ان شاء الله ورايح بانكوك وبتايا وبوكيت ايه المواصلات الرخيصه اللي ممكن استخدمها لو سمحت
 
N

Nader Baligh

Original poster
لو سمحتوا الناس الي سافرت تايلاند اسره 4 افراد يكفيها كام دولار هناك بعد الاقامه يعني فسح
 
G

Ghada Ali

Original poster
لو عندي اوبشن اقعد في شيانج ماي او بانجكوك
انهي احسن؟؟
 
M

Marwa Fawzy

Original poster
تقرير جميل اوي اوي شجعتني اخطط لرحلة يكون معايا فيها بناتي
 
د

دكتور محمد رضا

Original poster
من اهم النصايح ابعد عن الزيارات التجارية زي مصنع الكاجو العسل الؤلؤ الجلود

كلها تضييع وقت واسعارها غالية