رحلتي الي ماليزيا ( فسح و مزارات كوالالمبور )...

S

Shimaa Monir

:: مسافر ::
رحلتي الي ماليزيا
( فسح و مزارات كوالالمبور ) الجزء الثاني
(كل الصور من جوجل، مش تصويري )

ماليزيا بلد جميله، الاغلبيه مسلمين، و دة كويس من ناحيه الاكل و انه حلال، الطبيعه هناك حلوة اوي، الامطار الموسمية مخليه الخضره في كل مكان، عادي انك تشوف الجبال لونها اخضر و الغابات حوليك... كوالالمبور العاصمة متقدمة و نظيفه جدا، الناس مبتسمه و الكل بيقول thank u بدون داعي، كتير منهم بيكلم انجليش....

البلد فيها حجات كتير تتعمل، يعني مناسبه لمحبي الطبيعه و الخضرة...... فيها شوبنج و مولات كتير... و كمان فيها شواطئ و بحر في لنكاوي, بينانج و جزر اخري، و في جزء تاريخي من معابد هندوسية و متاحف.....في اماكن ترفيهية من ملاهي و zoo و aquarium..

بدون رغي كتير هتكلم عن
مزارات كوالالمبور اللي رحتها، لاني مرحتش كل حاجة

☝نزل 2 ابليكشن هحتاجهم ف الرحله: ابليكشن اسمه visit a city بتحدد البلد و تدخل علي sights جوة الابليكشن، هيقولك اهم الاماكن و المزارات فيها و اسعار تذاكر الدخول و مواعيد العمل. و ابليكشن rome2rio دة بتكتب اسم المكان اللي عايز تروحه جوه البلد و يقولك كل وسائل المواصلات باسعارها و وقتها اللي توصلك للمكان دة.

☝محدش يقولك لازم تروح كذا و كذا و كذا في كوالالمبور ، انصح كل حد يقرا عن المكان الاول قبل ما يروح... لان كل شخص له اهتماماته، و علي اساس كدة هينبسط....

يعني حد بيحب المغامراة و الترفيه و التنطيط هينبسط جدا في صن واي لاجون...

حد بيحب الحيوانات و الطيور و كدة، هيعجب بال zoo negara و حديقه الفراشات وحديقه الطيور..

حد بيحب المناظر الطبيعيه و الخضرة و الهدوء، landscape هينبسط جدا في جنتنج هايتس و كاميرون....

لو بتحب زيارات المعابد و temples, mosques. و كدة، اقصد اماكن اثرية، هيعحبك batu caves, Islamic mosques, Chinese temples

لو حد بيحب الشوبنج الرخيص و الهدايا التذكارية ، يروح تشاينا تاون.( دة منطقة شبه الوكاله او خان الخليلي عندنا، شوارع ضيقه اوي و بيبيعوا كل حاجة شنط، ساعات، محافظ، حجات تذكارية للبلد) و الفصال هناك رهيب...

لو حد بيحب شوبنج الماركات الhi end
يروح بافيليون مول و klcc mall
-----------------------------------------------

✍Batu caves ⛰
الدخول مجاني.
هو عبارة عن مجموعه كهوف limestone كبيرة جوه الجبل، (فوق الجبل في نهر معدي، فهتلاقي مياه نازله عليك، عادي)
بتطلع 272 سلمه (سلالام كتير اوي) و كمان مبلوله، عشان توصل للكهف، جوه الكهف بيقيم فيه شعائر دينيه للهنود، و سقف الكهف بينقط مياه النهر عليك، معظم الزوار هنود، مفيش مسلمين شفتهم،
و في كذا تمثال ضخم في مدخل المكان بره.
انصح لو حد صحته علي قده، ميطلعش.
في ناس بتاخد طوب احمر و تطلع بيه، مفهمتش ليه؟!؟

(عشان تروح له، انسب حاجة بالمترو، و الطريق بياخد ربع ساعه من محطة kl sentral)
✍sun way lagoon

دي مدينة ترفيهية كبيرة اوي، متقسمه ل
Water park العاب مائيه ممتعه جدا
Scream park بيت رعب كبير
Amusement park ملاهي من غير مياة
Wild park حديقه حيوانات
Extreme park دي اللعاب بفلوس اضافيه
(نزلوا خريطة صن واي لاجون من موقعهم)

دي تتراح الصبح من 10 ص، عشان تخلص كل الالعاب و تاخد معاك فوطة و مايوة في شنطة صغيرة.

التذكرة ب150 رينجت، لكن لو دفعت اونلاين هتكون ب120 رينجت، فدفعنا اونلاين و رحنا، دخلنا بconfirmation email
مكانش زحمه اوي علي التذاكر، لكن جوه كان زحمه علي حجز لوكرز في مدخل الwater park
عشان تسيب فيه ملابسك و حاجتك... وقفنا طابور لمده 40 دقيقه عشان ندفع تمن لوكر و نستلم مفتاحه....
(و في الاخر لقينا مجموعة لوكرز تانيه في map و فاضيه بدون طوابير، بس كنا خلاص اتدبسنا)
و بدانا بالالعاب المائية، حلوه جدا جدا، و معظم الالعاب بتتركب couple..
ملحوظة: الناس مش نازله بالمايوة، المعظم بهدومه و الله عادي كدة سواء رجالة او ستات
بعد ما تخلص الالعاب المائية، بتاخد شاور و تلبس لبسك و تروح باقي المدينه بقا، كل الالعاب مجانا ماعدا الاكستريم بارك، في اوقات معينه لعروض و شو الحيوانات......

✍bird park/butterfly park/orchid & hibiscus park

كلهم في منطقه واحدة، حديقه الطيور تذكرتها ب70 رينجت، و هي حديقه مفتوحة للطيور حواليك، مفيش سور، هو في بس شبكه فوق عشان ميطيروش.
حديقه الفراشات: كلها زرع و ورورد و الفراشات حواليك اشكال و اللوان ف كل مكان، التذكرة 30 رينجت تقريبا
حديقة الاوركيد: دخول مجاني و في انواع و فصايل كتير من ازهار الاوركيد الملونه الرائعه.

✍ petronas twin tower klcc
البرجين المشهورين، و الصورة التقليدية ادامهم، شكلهم الصبح غير بليل، هتروح عشان تتصور صورة تذكارية ، تحتهم المول
حلو اوي، كله براندز.....في جسر بيوصل بين البرجين و تذاكر له عشان تطلع فوق، بس انا مطلعتش.

✍ kl menara & upside down house
المنارة دي( زي برج القاهرة عندنا) بتطلع فوق تشوف كوالالمبور من فوق، و في مطعم دوار، و في اكواريم، mini zoo, xd theater, f1 simulator v و البيت المقلوب

كل دة بتذاكر مختلفه حسب هتدخل انهي... لو هتدخل كلو التذكرة ب155 رينجت... الاسعار و الباكدجات ع موقع الkl menara

جنب المنارة في نفس الشارع، دخلت بيت حلو اوي، اسمه البيت المقلوب: كل الاثاث فيه ملزوق في السقف، فلما تتصور و تقلب الصور، بتبقا تحفه،كانك واقف علي السقف بالضبط.

✍china town
دة زي الوكاله او خان الخليلي عندنا، شوارع ضيقه و مليانه محلات صغيرة بتبيع هدايا و تذكارت و شنط و محافظ و ساعات و لبس و كدة...الفصال هناك جامد

✍genting Heights
دي بقا مكان تحفه، الصور هتتكلم عنه اكتر...
فيو رائع، جبال كلها غابات و اللون الاخضر يغطي كل المكان، هتركب التلفريك ، تجربة مميزة، و من ارتفاعه هتدخل ف السحب... في محطتين للتلفريك، هتقف ترتاح في مول جنتنج و تاكل و تعمل شوبنج.... الملاهي اللي هناك بتجدد.. مرحناهاش...بس الرحله تستاهل.. بتركب باص من محطة kl sentral. بيروح جنتينج، الباص مواعيدة كل ساعه، و الطريق بياخد ساعه زمن طلوع الجبل، روح الصبح ع 10 عشان تستمتع طول اليوم، خلصنا ع 3 و مشينا...

✍shopping
China town
Klcc mall
Pavillion mall
Fahrenheit mall
Soko mall
Sang yang mall
Low yat plaza mall مول موبايلات و الكترونيات
Mitsui outlet mall دة مول جنب المطار، كله اوتليت
و طبعا سعر البراندات الماليزي كويسه جدا، غير الinternational brands
---------------------------------------
المواصلات في ماليزيا

ابليكشن جراب او اوبر
المترو طبعا
Go kl bus
دة مجاني و له 4 اللوان، كل لون
بيروح منطقة، اللون الموف بتاع السياح، بس ممكن تركب اي لون عادي لو رايح وجهتك، نزل خريطة الباص دة و وجهته من النت و استخدمه
بلاش التاكسي الاحمر و الازرق، اسعارهم غاليه
⛴ ferry
لو هتروح من كوالالمبور لبينانج او من بينانج ل لنكاوي، هتكون بالعباره
----------------------------------------
✍ i city( city of digital lights)
مدينه ترفيهيه، قريبه من صن واي لاجون، بتتراح بليل افضل عشان جمالها في الاضواء الled اللي علي كل الاشجار، كانها ديكورات كريسماس..و كمان في snow theme park
و فيها متحف شمع اسمه red carpet فيه تماثيل لاشهر الشخصيات العالميه، ممكن تتصور معاهم، بس هو لا يقارن بمتحف الشمع بتاع مدام tussad, شكل تماثيل الشمع مش real، و تحس انه نسخه مقلده...

طبعا في فسح تانيه ملحقتش اروحها...مرتفعات كاميرون و زيارة ل malacca....

‍الخلاصه، تقدر انتا تروح لوحدك اي مزارات او فسح، و هتتحكم ف وقتك افضل و اكيد سعر اقل عن باكدج اللي بشوفها ف الفندق....انا بصراحة مسالتش الاسعار في مكاتب الtours اللي بتنظم رحلات هناك...بس قارنت باسعار ع النت و اسعار رحلات مكتب سياحة ف الفندق اللي نزلت فيه.

‍و ممكن تحسب انتا الفرق عن طريق انك تعرف سعر تذكرة دخول كل مكان و سعر المواصلاة اللي هتوديك هناك....


لينك الجزء الاول من رحله ماليزيا
/Sicherheitskontrolle
QljOV2mCun2EW0sUOO9jiqSTfWaiSTDt.jpeg

QljOV2mCun2EW0sUOO9jiqSTfWaiSTDt.jpeg

QljOV2mCun2EW0sUOO9jiqSTfWaiSTDt.jpeg

QljOV2mCun2EW0sUOO9jiqSTfWaiSTDt.jpeg

QljOV2mCun2EW0sUOO9jiqSTfWaiSTDt.jpeg

QljOV2mCun2EW0sUOO9jiqSTfWaiSTDt.jpeg

QljOV2mCun2EW0sUOO9jiqSTfWaiSTDt.jpeg

QljOV2mCun2EW0sUOO9jiqSTfWaiSTDt.jpeg

QljOV2mCun2EW0sUOO9jiqSTfWaiSTDt.jpeg

QljOV2mCun2EW0sUOO9jiqSTfWaiSTDt.jpeg

QljOV2mCun2EW0sUOO9jiqSTfWaiSTDt.jpeg

QljOV2mCun2EW0sUOO9jiqSTfWaiSTDt.jpeg
 
التعديل الأخير بواسطة المشرف:
أعلى