السلام عليكم ورحمة الله وبركاته كنت من فترة...

م

مصطفى طلبة

عضو

السلام عليكم ورحمة الله وبركاته
كنت من فترة كتبت منشور عن طرق النصب الجديدة على الشباب اللي عاوز يخرج من بلده يبحث عن فرصة عمل كريمة وخصوصا الناس اللي عاوزة تسافر ماليزيا تشتغل (تشتغل) مش باتكلم هنا خالص عن السياحة والترفيه!
المنشور القديم كان مفصل لكن الفيسبوك كل فترة بيحذف حسابي بسبب البلاغات مش عارف ليه واتكلمت فيه عن مكاتب التشغيل اللي بتسفر الناس ماليزيا وده موضوعنا النهاردة ومكاتب الترويج لفيزا السفر إلى كندا وأستراليا وده موضوع تاني نتكلم فيه لاحقًا!
أهم النقاط العريضة فيما يخص هذا الموضوع وهذه نصيحة لوجه الله بعد منشورات الناس اللي اتنصب عليهم رغم إني حذرت ونشرت الكلام في كل الجروبات قبل كده لكن واضح في ناس بتحب يتنصب عليها وبيفكروا إنه اللي بينصحهم ده شخص لا يريد المصلحة وإنسان معقد بينما لما نصاب يقولهم الحياة زي الفل والفلوس والشغل زي الرز يصدقوه فورًا وبعدها يقولوا اتنصب علينا !
النصيحة الأولى: السفر لماليزيا أسهل ما يكون ومش محتاج مكاتب يعني تحجز الطيران والفندق وتسافر مباشرة فلا تتعب نفسك وتسأل وتدفع فلوس ع الفاضي لشخص يقولك هاسفرك إلا لو ناوي تطلع مع مكتب سياحة أو جروب سياحي محترم كسياحة ودي قصة أخرى ملهاش علاقة بموضوعنا.
النصيحة الثانية: مفيش مكاتب عمل لتشغيل الناس خارج ماليزيا وكل المكاتب دي ثبت بالدليل القاطع إنها نصابة ولا يوجد استثناء نهائيا في هذا الموضوع.. إياك تدفع جنيه لشخص يقولك هاسفرك ماليزيا تشتغل هناك وهاعملك إقامة لما توصل لأنك بكل بساطة منصوب عليك وهتتبهدل قوي!
بالتجارب الناس اللي سافرت استلمتها مافيا هنا وشغلوهم في كل أنواع الشغل المهين سواء في مصانع أو أي شغلانة لمدد طويلة وعشان الشباب عنده أمل إنه هيكون عنده إقامة بيشتغل ويتحمل لكن المفاجأة بعد 3 شهور الناس دي تم طردهم من الشغل وقالوهم بالحرف (برة من هنا أو نبلغ البوليس) وهناك حالات كثيرة أعرفها شخصيا تعرضت لهذا النصب ومن ضمنهم الأخ صاحب الصورة المرفقة حالة جديدة وواضحة.
طبعًا لو ذهبت إلى البوليس ولا هيعملك حاجة لأنك غالبا مش معاك ورق ولو أصلا قلت لهم أنا كنت شغال في المكان الفلاني فأنت مخالف أصلا وليس لك أي حقوق لأنه ممنوع العمل بفيزا السياحة.. شايف النصب الاحترافي؟!
النصيحة الثالثة: لو كنت هتسافر ماليزيا عشان تدور على شغل ومش معاك غير فلوس السفر (التذاكر ومصاريف المعيشة) اعمل حسابك إنك بدرجة كبيرة هتخسرهم وغالبا مش هتلاقي شغل ولو الفلوس دي مش فارقة معاك عادي سافر وجرب حظك كأنك رايح سياحة ولكن إياك تكسر الفيزا!
مرة أخرى الشغل هنا صعب ولو وجدت شغل فغالبا هيكفيك يادوب أكل وشرب وسكن وممكن تتعرض للقبض عليك ولو عدت على خير بعد 3 شهور هتلاقي نفسك معملتش حاجة ومضطر إما ترجع بلدك أو تكسر الفيزا وفي الحالة دي أنصحك على بلدك فورًا ولا تستمع لكلام أحد لأنك لو كسرت الفيزا هتعيش عبد ذليل عند اللي مشغلك ولما تحصل أقل مشكلة هيسلمك للشرطة ده لو يعني لم يتم القبض عليك في حملة تفتيش عشوائية لوزارة الهجرة والجوزازات وساعتها هتدخل السجن والسفارة ولا هتعبرك والحكومة الماليزية مش هترحلك هترميك في السجن لحد ما يظهر لك صاحب وتشوف محامي وتدفع دم قلبك غصب عنك وبعدها تشتري تذاكر على حسابك وترجع بلدك وتاخذ حظر 5 سنين.
وفي ناس حصل معاها كده وأهلهم الغلابة باعوا عفشهم أو استلفوا فلوس عشان يصرفوا على محامي وابنهم يرجع لهم تاني!
النصيحة الرابعة: ماليزيا بلد جميلة جدًا كسياحة ومن أسهل الدول في السفر إليها وأنا أنصح الجميع بالسفر لها كسياحة وترفيه سواء عائلات أو أفراد والدراسة فيها كويسة جدًا وجامعاتها رائعة ولكن فيها عمالة من كل الجنسيات الآسيوية ورخيصة وفرصة العرب في العمل تكاد تكون معدومة ومفيش حد هيشجعك على السفر من غير ما يكون ليك شغلانة وإقامة محددة من بلدك (وهذا نادر جدًا) غير شخص نصاب عايش هنا على النصب أو شخص منتفع عاوز الناس تيجي عشان يأجر شقة منه أو تعمل رخصة أو تاكل عنده وجبة أو تشرب شيشة غير كده هتلاقي الناس المحترمة لا تنصحك بالسفر إلا لو معاك فلوس للسياحة والترفيه أو استثمار وفي حالة الاستثمار لو معاك كحد أدنى 50 ألف دولار توكل على الله وادرس السوق ولا تعتقد أن هذا المبلغ كبير لأنك ممكن تفتح نشاط وتخسره في أشهر قليلة بعد ما تلاقي مفيش دخل وبتدفع رواتب!
هذه نصائح قليلة ومختصرة لأني شفت أكثر من منشور فيه نصابين وناس منصوب عليها وربنا ينتقم من كل نصاب يتاجر بأحلام الشباب ومستقبلهم عشان يسرق فلوسهم.
v93uLuGNiU_mjTv8z18hl0ZhXHU8eRrc.jpeg
 

E

Eslam Khaled

عضو
وانا جاي من اربع أيام علي مصر الطيران للصين كان ف ٨ مسافرين ماليزيا وأول ما شوفتهم عرفت انهم رايحين كوريا او ماليزيا سألتهم قالولي ماليزيا و الراجل اخد منهم ٤٠ الف جنيه صعبوا عليا جدا علشان باين عليهم انهم مش لاقيين وقفت معاهم شرحتلهم الوضع و طبعا خلاص هما ف نص الطريق ومافيش رجوع و سبتهم و كملت طريقي و ربنا يكون ف عونهم
 
T

Taha Mokhtar

عضو
متتعبش نفسك
الناس هي اللي عايزه يتنصب عليها
من فتره كنت منزل سلسه مواضيع عن السفر من غير ما يتنصب عليك ( تركيا وماليزيا وروسيا وقبرص ) وكتبت ان الوضع هناك صعب فعلا بس لو دماغك قفلت وعايز تسافر تجرب جرب من غير سمسار علشان ميبقاش الخساره مضاعفه
تخيل كميه الرسايل اللي جتلي ( سفرني - عايز اسافر - متعرفش حد امين ياخد فلوس ويسفرني ) وكانك بتدن في مالطه
يا فندم احنا ربنا بينجينا من فرعون نروح نعبد العجل فانسي بجد عن تجربه بس برضه اعمل اللي عليك كنوع من اللهم بلغت
 
M

Manal Afifi

عضو
نفس الكلام ينطبق حرفيا علي اوروبا كلها ولا استثني اي دوله فيها ولكن الوضع في اوروبا اصعب لان كل دوله في اوروبا ليها لغتها ولو مش معاك اللغه دي ومعاك 5 دكتوراه مش هتشتغل حتي عامل نظافه في الشارع ....نيجي للنصب الجديد ودي شبكه الحديث عنها في المانيا حاليا والاتحاد الاوروبي مرعوب من ساعه ما اكتشفوها ...الاخوه النشامي العراقيين والسوريين بالتعاون مع عصابات في اوكرانيا وبلغاريا عاملين مافيا كامله الاول كانت بتهرب السوريين والعراقيين للالمانيا او اي دوله في الاتجاد الاوروبي وبيعملوا لجؤ وبعدين الاجئين نفسهم دلوقتي هم اللي عملوا شبكه جديده وشغالين مع نفس عصابات بلغاريا واوكرانيا وبيهربوا الناس عموما من اي دوله المهم يوصل لتركيا ومن هناك بيتم التهريب الي اوروبا ...بياخدوا كام ...الاسعار تبتدي من 20 الف يورو للفرد الواحد...المصييبه فين غير النصب ان الاخوه العرب طلعوا بيبيعوا المهاجرين دول في تركيا وفي اوكرانيا وبيتم بيعهم لو اطفال لشبكات الدعاره والمخدرات ولو كبار بيتم بيعهم كقطع غيار بشريه.....تخيل بقي يا استاذ ان بعد اللي حضرتك واي حد هيكتب هنا علي المصايب دي هتلاقي الانبكس والخاص عندك اتملي طلبات ناس عاوزه تهاجر انا حسه اننا بنتكلم مع روحنا سبحان الله
 
A

Abd El Hamid Sherief

عضو
حتي الناس اللي شغالة في مالتيناشونال كامبانيز وقدامهم فرص يقدموا علي شغل داخلي بين فروع الشركة المختلفة بيبقي صعب يقدموا علي فرص في ماليزيا دلوقتي لأن الشركات في ماليزيا بتمشي أصلا غير الماليزيين زي كل حته دلوقتي اللي بتحاول تقلل عدد العمالة الغير محلية وده في كل حته في العالم دلوقتي.... زي فرص العمل اللي في الإتحاد الأوروبي اللي بتطلب تصريح عمل إتحاد أوروبي
 
A

Ahmed Moustafa

عضو
كنت بروح ماليزيا في التسعينات كانت ولا تزال من غير فيزا واقامه عند الوصول 90 يوم. قابلت شباب مصري جاي من الاردن بفيزا لماليزيا دفعين فيها الاف الشاهد ان قصه السفر كلها نصب والامل في السفر انه هايغير الحال بيخلي الناس مش بتفكر وبتكون فرصه لمعدومي الضمير.
 

المواضيع المشابهة


أعلى