*دليل المصري لرحلة الحلم - كاس العالم* تواريخ...

K

Khaled Alaa

عضو

*دليل المصري لرحلة الحلم - كاس العالم*

تواريخ مهمة:
- قرعة كاس العالم هتتعمل يوم ١ ديسمبر ٢٠١٧
- ماتش الافتتاح يوم ١٤ يونيو ٢٠١٨
- دور المجموعات هيتلعب من يوم ١٤ يونيو حتي يوم ٢٨ يونيو
- دور ال ١٦ من يوم ٣٠ يونيو ختي يوم ٣ يوليو
- دور ربع النهائي يومي ٦ و ٧ يوليو
- دور نصف النهائي يومي ١٠ و ١١ يوليو
- ماتش الثالث والرابع يوم ١٣ يوليو
- النهائي يوم ١٤ يوليو

المدن والملاعب:
كاس العالم ٢٠١٨ هيتلعب في ١١ مدينة و ١٢ ملعب:
> موسكو: ملعب لوزينيكي "ملعب الافتتاح والنهائي" "٨١ الف متفرج" وملعب سبارتاك "٤٥ الف متفرج"
> سانت بيترسبيرج "٧١١ كم من موسكو": ملعب سانت بيترسبيرج "٦٨ الف متفرج"
> كالينجراد "٨٠١ كم من موسكو": ملعب كالينجراد "٣٥ الف متفرج"
> كازان "٨١٥ كم من موسكو": ملعب روبن كازان "٤٥ الف متفرج"
> نيزني نوفوجرود "٤١٦ كم من موسكو": ملعب نيزني نوفوجرود "٤٥ الف متفرج"
> سامارا "١٠٥٢ كم من موسكو": ملعب "انت بتلعبي بالنار يا سمارا" "٤٥ الف متفرج"
> ڤولجوجراد "٩٧٠ كم من موسكو": ڤولجوجراد ارينا "٤٥ الف متفرج"
> ييكاترينبرج "١٧٨٤ كم من موسكو": الملعب الرئيسي "٣٥ الف متفرج"
> سوكي "١٦٢٢ كم من موسكو": ملعب فيشت الاوليمبي "٤٧ الف متفرج"
> روستوف "١٠٧٦ كم من موسكو": روستوف ارينا "٤٥ الف متفرج
> سارانسك "٦٥١ كم من موسكو": موردوڤيا ارينا "٤٥ الف متفرج"

نتكلم في تفاصيل السفر... ورقة وقلم واكتب معايا...

الطيران "متوسط ٤٠٠ دولار":
مش عارف نحسبن علي مين ان مافيش طيران مباشر حتي الان... حتي لو رجع أتوقع شرق الدلتا للطيران "مصر للطيران سابقا" هتغلي التذاكر استغلالا للموقف... ارخص طيران حاليا من القاهرة هو علي الخطوط اليونانية وهيتكلف حوالي ٣٩٠ دولار من القاهرة الي موسكو والعودة... وبرضه الخطوط النمساوية الرحلة عليها هتكلف ٤٢٢ دولار... العائق الوحيد في الاتنين دول ان عشان تلاقي سعر كويس هتترزع ترانزيت محترم بتاع ٨ ساعات في بلد من الاتنين... بس انا شخصيا مابتفرقش معايا عشان بنزل ادخل البلد واضيع فيها الوقت واهو اشوف بلد جديدة.
الرحلة من دبي هتكلف ٣٨٠ دولار علي الخطوط الروسية... وخبر مش لذيذ لاعزائنا قاطني السعودية ان الرحلة من الرياض هتتكلف حوالي ٧٠٠ دولار علي الخطوط الأردنية فالاسهل انك تيجي تسافر من مصر
* انت كده كده بنسبة ٩٩،٩٪ هتعمل ترانزيت عشان مافيش طيران مباشر من القاهرة فمن الحلول المهمة عشان نشتري تذاكر رخيصة هي انك تدور علي سفر للبلد اللي هيتلعب فيها اول ماتش للمنتخب وترجه علي ام الدنيا من اخر بلد هيتلعب فيها.
* احسن موقع بيدور علي تذاكر طيران هو بلا منازع وكمان في ابليكاشن بتجيب من الناهية ارخص تذكرة في العالم اسمها HOPPER لانها بتدور علي ارخص يوم واقل fare وبتقلل في الشنط والحاجات دي.

الإقامة "متوسط ٤٠ دولار في اليوم":
أسعار الفنادق مش غالية اوي في روسيا وسهل تلاقي فنادق ٣ او ٤ نجوم ما بين ٣٥ او ٥٠ دولار في الليلة... والاوبشن الاحسن كمان هو موقع Airbnb.com وده هنلاقي عليه ستوديوهات او بيوت نأجرها باليوم واريح وارخص ما بين ٢٠ ل ٥٠ دولار في اليوم حسب المدينة.
الأهم هو لازم نستني لحد لما القرعة تتحدد عشان نعرف نحجز في أي مدينة وكام يوم... "هبقي اكتب في التعليقات عن احسن الاماكن في كل بلد لما تتحدد القرعة".
* يا تستخدم Expedia.com يا اما Airbnb مافيش حل تالت.

تذاكر المباريات "٣٤٧ دولار":
اغلي كنوز الدنيا حاليا ولمدة ٩ شهور جايين... في ٣ طرق مالهومش تالت عشان تشتري التذاكر...
١) عن طريق القرعة اللي بيعملها موقع الفيفا...
٢) عن طريق الشراء المباشر من موقع الفيفا في الاوقات اللي متحددة وهكتبها تحت ودي باللي يلحق.
٣) من سمسار موثوق وده اغلي حل ومش هنلجأ له الا في الحالات المستعصية عشان في حوار في تغيير التذكرة باسمك هتكلم عليه.

خلينا في اول اختيارين وهي التذاكر اللي هتتباع رسمي من موقع الفيفا... دي ليها ٣ مراحل:
١) المرحلة الاولي "الجزء الاول"... البيع بالقرعة... التسجيل من يوم ١٤ سبتمبر حتي ١٢ أكتوبر... وهتعرف اذا تم اختيارك يوم ١٥ نوفمبر ٢٠١٧.
١) المرحلة الاولي "الجزء الثاني"... البيع بأولوية الدفع... يعني تدخل تختار التذاكر وتدفع يبقي اشتريت خلاص... والمرحلة دي من يوم ١٦ نوفمبر حتي يوم ٢٨ نوفمبر.
٢) المرحلة الثانية "الجزء الاول"... البيع بالقرعة... التسجيل من يوم ٥ ديسمبر حتي ٣١ يناير ٢٠١٨... وهتعرف اذا تم اختيارك يوم ١٢ مارس ٢٠١٨
٢) المرحلة الثانية "الجزء الثاني"... البيع بأولوية الدفع... يعني تدخل تختار التذاكر وتدفع يبقي اشتريت خلاص... والمرحلة دي من يوم ١٣ مارس وحتي ٣ ابريل.
٣) المرحلة الثالثة والأخيرة... التذاكر المتبقية من كل المراحل... وهتكون بأولوية الدفع برضه... من يوم ١٨ ابريل وحتي اخر البطولة.

التذاكر بتتباع ب ٣ اختيارات... "مسموح لكل شخص يشتري 4 تذاكر فقط"

١) تذاكر منفردة لكل ماتش انت تختاره زي الافتتاح او النهائي او نصف النهائي"
- ماتش الافتتاح ب ٢٢٠ دولار
- ماتش في دور المجموعات ب ١٠٥ دولار
- ماتش في دور ال ١٦ ب ١١٥ دولار
- ماتش في ربع النهائي ب ١٧٥ دولار
- ماتش في نصف النهائي ب ٢٨٥ دولار
- ماتش النهائي ب ٤٥٥ دولار
* الأسعار دي للدرجة الثالثة

٢) تذاكر لملعب معين... ودي فيها من ٤ ماتشات الي ٦ ماتشات ما بين المجموعات ودور ال١٦ ومافيش فيها الافتتاح او ربع النهائي ولا نصف النهائي ولا النهائي... وده اوسخ اختيار للتذاكر عامة مانصحش بيه خالص.

٣) تذاكر لفريق معين... وهو ده الكلام... التذاكر دي فيها اختيارات من اول انك تحضر ٣ ماتشات المجموعات بس لحد انك تشتري تذاكر ل٧ ماتشات متضمنة المجموعات لحد النهائي...
- تذكرة فريق محدد ل ٣ ماتشات المجموعات ب ٣٤٧ دولار
- تذكرة فريق محدد ل ٤ ماتشات المجموعات ودور ال ١٦ ب ٤٧٣ دولار
- تذكرة فريق محدد ل ٥ ماتشات المجموعات ودور ال ١٦ وربع النهائي ب ٦٦٦ دولار
- تذكرة فريق محدد ل ٦ ماتشات المجموعات ودور ال ١٦ وربع النهائي ونصف النهائي ب ٩٧٩ دولار
- تذكرة فريق محدد ل ٧ ماتشات المجموعات ودور ال ١٦ وربع النهائي ونصف النهائي والنهائي ب ١٤٨٠ دولار
* الأسعار دي للدرجة الثالثة

حد يسألني لو فريقنا الحزين ماتأهلش كالمتوقع هنعمل ايه لو انا اشتريت مثلا تذكرة من اللي فيها ٧ ماتشات؟ التذاكر دي هتضمن لك تحضر ماتش في كل دور وهتضمن لك تحضر النهائي حتي لو فريقك ماتأهلش... بكل بساطة هتمشي مع الفريق اللي هيتأهل مكان بلدك.

طيب... خطوات انك تحجز تذكرة سهلة وبسيطة من علي اللينك ده

١- هتعمل اكونت علي موقع فيفا اول حاجة.
٢- اختار بلد الإقامة بتاعتك وجنسيتك.
٣- بعد كده هتوافق علي الشروط والاحكام.
٤- اختار نوع التذاكر اللي انت عايزها وعدد الماتشات... وهنا ارشح انك تحجز تذاكر الفريق المحدد "مصر" ٣ او ٤ ماتشات هتلاقي اسمها TST4 او TST3.
٥- بعد كده تختار انت عايز كام تذكرة "لو حد هيسافر معاك... وهنا مفيش سن بيفرق... اللي عنده سنتين زي اللي عنده ٧٠ سنة كله نفس السعر.
٦- هيطلب منك تدخل بياناتك بالتفصيل "رقم جواز سفرك واسمك بالكامل وتاريخ ميلادك وعنوانك.
٧- لو كنت حاجز لحد تاني معاك هيطلب منك نفس التفاصيل لكل شخص برضه.
٨- هتروح علي صفحة الدفع... حاليا انت بتدخل بس رقم الكارت بتاعك بس مابيتسحبش منه فلوس ولا بيتحجز علي الفلوس... لكن لو بعتولك ايميل ان اسمك طلع في القرعة هيسحبوا وقتها الفلوس.
٩- طبعا لو الكارت بتاعك فيزا هيكون عندك أولوية في الفرص في القرعة... لو ماستر كارد يبقي ضم جنب اخواتك في عامة الشعب.
١٠- بس كده انت حجزت دورك... ادعي ربنا وصلي كتير.

حد كان في البلكونة يجي يسألني لو حجزت لحد معايا او حتي التذكرة اللي باسمي والشخص ده مش هيعرف يسافر وقت البطولة ايه اللي هيحصل؟ بعد لما يخلص بيع التذاكر في الاخر خالص قبل البطولة علي طول هيتعمل لينك للناس اللي معاها تذاكر انها تدخل تنقل في التذاكر باسم شخص تاني "زي اللي السمسار هيعمله لو اشتريت منه"... وفي اللينك ده برضه هتقدر تحط التذاكر الزيادة لو معاك بعني للبيع.

لو ربنا كرمك ان شاء الله واستلمت التذاكر لازم تدخل علي موقع

عشان تطلع منه كارت المشجعين اللي هيدخلك روسيا من غير فيزا وتركب بيه المواصلات العامة.

اخر حل بقي لو الدنيا لطشت معاك في موضوع التذاكر... انك تلجأ للسوق السودا بس لازم تكون عارف حد شخصيا عشان النصب هنا بالكوم والقانون لا يحمي المشجعين #معروفة

المصاريف اليومية "متوسط ٣٠ دولار في اليوم":
روسيا عامة مش من البلاد الغالية "مش مقارنة بمصر" بس من المتوقع ان في حاجات هتغلي وقت البطولة بالذات في البلاد اللي عليها الطلب زي موسكو... مثلا زجاجة المية ب ٥٠ سنت... علبة الكوكاكولا بدولار... أكلة في مطعم نص كم هتكلفك حوالي من ٨ الي ١٠ دولار... ولو مطعم عليه القيمة شوية ممكن تدفع من ١٥ ل ٢٠ دولار... قهوة من كافيه مثلا ب ٢ او ٣ دولار... الكومبو من ماكدونالدز بحوالي ٥ دولار... علة السجاير بحوالي ٢ونص دولار.

التنقلات بين المدن "متوسط ٢٠٠ دولار":
المهم ان المواصلات العامة في وقت البطولة للناس اللي معاها تذاكر ببلاش طول ما انت معاك التذاكر وكارت المشجعين... ولكن اسوء حاجة في البطولة هي ان كل فريق في دور المجموعات هيلعب في ٣ مدن مختلفة... وبالتالي بالمسافات دي لازم قطر او طيارة وهنا الموضوع مش رخيص... الرحلة اتجاه واحد بالقطر بين موسكو وسانت بيترسبيرج مثلا بحوالي ٣٠ دولار ولو في وقت عليه طلب زي من ٨ الصبح ل ٥ مساءا ممكن توصل ٧٥ دولار. فلو هتحضر ال ٣ ماتشات لمصر مثلا هتحتاج ٤ رحلات عشان ترجع موسكو تاني في الاخر عشان الطيارة.
* في حل بقي لو حد هيسافر في جروب من ٤ مثلا وده انا بعمله كتير عن نفسي وبستمتع بيه... وهو اننا نأجر عربية ونشارك الايجار والبنزين لانه كده هتسافر في الوقت اللي يناسبك وهتستمتع بالطريق فشخ خصوصا لو كذا حد هيبدل في السواقة "عشان متوسط المسافات دي هي ٨ ساعات سواقة"... الفكرة دي ممكن تلاقي مثلا ان ال ٤ مسافرين بعربية جولف مثلا وكل واحد دافع ٣٠ دولار بالكتير.

الحياة الليلية "متوسط ٥٠ - ١٠٠ دولار في السهرة":
طبعا مش هتكلم كتير... احسن أماكن يتسهر فيها هي... unlocked upon request ربنا يوفقكم.

* كده لو خدنا مثال ان انت هتسافر من يوم ١٣ يونيو قبل الافتتاح بيوم وهتقعد ١٦ يوم عشان تحضر ٣ ماتشات مصر في المجموعة يبقي السفرية هتتكلف ٢٢٦٧ دولار بالضبط (تذكرة الطيران من القاهرة، اوضة في اوتيل محترم او ستوديو ل ١٦ ليلة، مصاريف يومك، تذاكر الماتشات، وسفر بالقطر بين ٣ مدن ورا المنتخب وتسهر ٤ مرات).

* اهم حاجة... عقلك في راسك تعرف خلاصك قبل يوم ١ ديسمبر عشان النصيحة الاهم في كل ده ان يوم ٢ ديسمبر لازم تكون مخلص في الطيران والفنادق عشان مايغلوش... ده علي اعتبار انك ان شاء الله من المحاظيظ اللي هيقفشوا التذاكر قبل كده... اما لو كنت وقتها لسه ماشترتش التذاكر يبقي خلص في التذاكر الاول لانها العامل الاهم في الموضوع كله # منقول
M9_dtacWHu5biCLhkqh39PMzzLZVCGIT.png
 

A

Ayman Fares

عضو
هي النتقلات ببلاش داخل المدن فقط اللي فيها الماتشات للي معاهم التذاكر ومش بين المدن ؟؟
 
A

Ahmed Gamal

عضو
سؤال وحيد..
منين جبت موضوع Visa فرصها اعلى من Master card؟
انا عارف ان Visa هما ال Sponsor الاساسي.. لكن ماتكتبش النقطه دي في اي مكان ولا حتى كان عليها تلميح!
 
M

Mohamed Rashad

عضو
تقرير محترم بس ملاحظة بسيطة علي اسعار الفنادق انها هتختلف تماماً عن اسعار دلوقتي وهيبقي متوسط الغرفة فندق ثلاث نجوم من ١٥٠ ال٢٠٠ دولار في الفترة دي
 
S

Sherif Maldini

عضو
Hisham Moustafa
Amr Nabil
Mohannad El Gamal
Mohamed Zakzouk
Sherif Farid
Karim Samy
Ahmed Sobhi Hamidou
Mohamed AbdelHamed
Mohamed Soussa
Ashraf Yassin
Islam Eweda
Ahmed Kassem
Mohamad Amgad
Ingy Soussa
Naglaa Sarhan
Mai Mohamed Saad
LayLa Alaa
Hadeer Abd El Moniem
 
I

Islam Eweda

عضو
Ehab El-Sayed Ahmed Ammar Amr Ammar Nabil Atef Mohamed Mahfouz Ismaeel Awad Mohamed Saleh Mohamed Abo Wafia Marwan Yassien Ziad Al Sharkawy Ahmed Fouad
 

المواضيع المشابهة


أعلى