روسيا 2015 بمناسبة كاس العالم والسفر لروسيا...

D

Doaa Yousry

عضو
#1

روسيا 2015

بمناسبة كاس العالم والسفر لروسيا هحكي شوية تفاصيل عن سفريتي لروسيا اللي كانت من سنتين بالظبط، في سبتمبر 2015

مبدأياً كدة روسيا كانت من البلاد اللي نفسي ازورها وكان ده وقعه غريب على أي حد لانهم كانوا شايفين ان غريبه اني افكر اسافر سياحة لروسيا طيب راحت فين أوروبا او تايلاند مثلاً؟ بس انا كدة كان عندي ولسه عندي طموح للسفر لبلاد مش كل الناس عاوزين يسافرولها كان منها روسيا واليابان وكوريا الجنوبية وطبعاً استراليا وكنت دايماً بشوف صور الكرملين الملونة دي ويبقى نفسي اوي اروح .. محدش شجعني على روسيا ولاني اتعودت مربطش نفسي بالناس لو مفيش حد معايا فقررت اسافرلها لوحدي

في الفترة دي وبالصدفة كانت طالعة في الشركة اللي كنت بشتغل فيها في الوقت ده سفرية بيزنس لروسيا عازمين فيها دكاترة عملا للشركة وكان في دكتور اعتذر في اللحظات الأخيرة وانا كنت بفكر فقولتلهم انا ممكن اطلع مكانوا وادفع انا تكلفة الرحلة (التكلفة كانت اقل كتير من السفر تبع شركة سياحة لانه اوفر لمجموعة كبيرة) وفعلا اتفقنا وقررت وكان فاضل حوالي 10 أيام بس على السفر !!

رحت وديت الباسبور لشركة السياحة اللي هنسافر معاها وكان ساعتها يوم اربع والسفر السبت اللي بعد بعده يعني خلاص مفيش أي وقت.. بسرعة رهيبة كنت في نفس اليوم عملت كشف حساب البنك والاتش ار ليتر والباسبور بتاعي دخل السفارة يوم الخميس وانا مترقبة بقلق ياتري هسافر ابتدي احضر حاجتي ولا لا!! المفاجأة اللي محدش عرف يفسرها ان السفارة وافقت على الفيزا وخرجت الباسبور نفس اليوم ، اه والله الخميس بليل كان الباسبور خرج من السفارة ومع مندوب شركة السياحة مع العلم ان الباسبور بتاعي في الوقت ده كان عليه ختم دخول وخروج لبنان وتركيا ودفعت قيمة الفيزا حوالي 1750 جنيه (معرفش تكلفتها كام دلوقتي)

الجو في شهر 9 عندنا بيبقى لسه صيف لكن عندهم شتا زي الشتا عندنا في مصر (طبعاً الشتا بتاعهم قارس جدا وصعب ودرجات الحرارة بتوصل ل 40 تحت الصفر) ونزلت ايامها اشتريت لبس شتوي كان لسه نازل في بعض المحلات في كايرو فستيفال (دي اسرع سفرية قررتها وعملتها)

قرار السفر مع جروب مش متعودة عليهم اوي مكانش قرار صح 100 % ولو ان الرحلة كانت منظمة كويس لكن كانت مليانة بمشاوير الشوبنج وانا من الناس اللي بحب اتفرج على البلد واتفسح اكتر ما اشتري هدوم وحاجات موجود شبهها في مصر وكمان معرفتش اتحرك كتير لوحدي لاني كنت مرتبطة بالجروب (من تجربتي في تركيا اجمل سفريات هي اللي بنلف البلد كلها من أولها لاخرها بالمترو والمواصلات العامة ونحس اننا بجد اخدنا على البلد)

روسيا بلد قريبة اوي الطيارة اخدت 5 ساعات بس و لما وصلت المطار طلع ان الفيزا بتاعتي كان فيها مشكلة لان بالغلط مكتوب فيها بالروسي "ولد" وقعدوا يكلموني وانا مش فاهمة أي حاجة بس جت ظابطة في المطار قالتلي مكتوب ولد وانتي بنت ، انا افتكرت بصراحة هيرجعوني مصر لكن كانوا في منتهي الذوق وقالولي اتفضلي استريحي ولغوا الفيزا (لسه الفيزا على الباسبور بتاعي بختم الإلغاء بتاعها) وعملولي واحدة جديدة صح وختمولي دخول

الناس في روسيا بشكل عام لطاف جدا وذوق ومتعاونين ماعدا قلة قليلة لكن مشكلتهم الحقيقية لغتهم صعبة جدا جدا فطرق التواصل صعبة لان فهمهم قليل اوي للانجليزي لكن ربنا كان كرمني بزميل ليا في الشغل قبل ما اسافر بيعرف روسي عملي ورقة فيها الكلمات والجمل اللي ممكن احتاجها وكاتبلي جمبها معناها بالعربي وبتتنطق ازاي (حاجة على طريقة بولي كا تا )

بدون حساسية يا بنات، الروسيات فعلا من اجمل البنات في العالم وعلى فكرة انا روحت لبنان وتركيا بلاد فيها بنات حلوة لكن الروسيات اجمل بنات فعلا وطبعاً في منهم كتير متوسطين الشكل وفي مش حلوين .. الشعب الروسي بشكل عام ملون بجمال مش مجرد ملونين من غير ملامح حلوة

اللبس هناك في برندات أسعارها عالي جدا وفي برندات وحاجات أسعارها عادية جدا زي مصر وانا مجربتش خالص المواصلات العامة بس الاكل لازم نتأكد انه حلال ونحاول نفهم مكوناته لان عندهم اكلات عجيبة، السالمون من الاكلات المنتشرة جدا للمسلمين لدرجة ان الاوتيل في الفطار حاطط سموكد سالمون في الاوبن بوفيه (انا رجعت من السفرية دي عندي ادمان فظيع للسموكد سالمون)

رحنا مدينتين، موسكو ودي زرنا في الكرملين (يعتبر البرلمان الروسي) وهو عبارة عن سور كبير جواه عدة مباني وزرنا الميدان الأحمر وانا رحت يوم لوحدي لفيت في موسكو رحت مسرح البولشوي وحديقة مركزية كبيرة كانت جميلة اوي اوي وفيها شلالات صناعية صغيرة و عروض مجانية كدة شغالة اغلب الوقت وحاجة مبهجة جدا، ورحت كمان متحف لموسيقار روسي مشهور (تشايكوفسكي) هو كان بيته تقريبا وادامه معمول تمثال ليه وشغالة علطول موسيقي ليه من جوه القصر وفي ناس بتدخل لكن انا مهتمتش واشتريت كمان سوفنيرز كتير من موسكو من محطة المترو (محطة المترو أدوار كتير كلها عربيات واكشاك ومحلات صغيرة بتبيع حاجات كدة (عندهم عتبة ووسط البلد زيينا)

سافرنا من موسكو لسانت بيترسبيرج بالطيارة (الطيارة حوالي ساعة ونص) وللأسف وصلنا متأخر وكنت تعبانة لان التشيك ان اتاخر وتقريبا اليوم راح على الفاضي وتاني يوم رحنا كذا قصر ومتحف في سانت بيترسبيرج وطبعا اللف بس بالباص والفرجة على الشوارع فسحة ورحنا مول عشان الشوبينج بس انا كنت تعبانة من اللف طول اليوم فخدت تاكسي وروحت (التاكسيات هناك موجودة عند المولات والمناطق الشهيرة لكن لو شارع عادي او عند الاوتيل بيتطلب بالتليفون ) ولازم ابقي سائلة الاوتيل او المرشد اللي معانا على تكلفة الرحلة لانهم بيزودوا لما يلاقوا سايح وبتناقشوا عادي في تكلفة الرحلة الأول وقولوا انا سائل والتكلفة كذا

رجعت ركبت تاكسي تاني بليل من الاوتيل لمكان العشا وده كان في مطعم جميل اوي عامل عروض شبه الشو الروسي اللي كان موجود زمان اتبسطت فيه بس وانا ماشية من روسيا كنت زعلانة اوي كنت حاسة ان عندي طاقة وعاوزة الف واتفرج اكتر

في روسيا دخلت صيدلية اشتري مسكن والصيدلانية كانت بتعرف تتكلم انجليزي ورغينا كتير اوي وقالتلي انها جت شرم الشيخ لكن متبسطتش والناس بترخم عليهم هناك ومبتفكرش تكرر التجربة حاولت اقنعها تيجي في الشتا واوديها الأقصر واسوان هتتبسط لكن كان شكلها مش مقتنعة (الروس طبقات زي أي دولة في العالم وغالبا الروس اللي عايشين في مصر من الطبقة العادية) لكن اللي بييجوا زيارة بس واضح انهم من الطبقة المتوسطة او العليا وتقريبا في ناس بتطفشهم برخامتهم

روسيا من البلاد الجميلة اوي اوي بس كانت محتاجة مدة اكتر من 5 أيام (على الأقل 7 او 8 أيام) ومحتاجة طريقة للتواصل عشان الف فيها لوحدي اكتر وهي مش امان اوي بليل يفضل دايما المشي بصورة الباسبور مش اصله ولو هنخرج بليل نبقي مجموعات (واحد في الجروب اتنشل بليل وهو ماشي لوحده جمب الاوتيل)
روسيا 2015 بمناسبة كاس العالم والسفر لروسيا... 380497 المسافرون العرب

روسيا 2015 بمناسبة كاس العالم والسفر لروسيا... 380498 المسافرون العرب

روسيا 2015 بمناسبة كاس العالم والسفر لروسيا... 380499 المسافرون العرب

روسيا 2015 بمناسبة كاس العالم والسفر لروسيا... 380500 المسافرون العرب

روسيا 2015 بمناسبة كاس العالم والسفر لروسيا... 380501 المسافرون العرب

روسيا 2015 بمناسبة كاس العالم والسفر لروسيا... 380502 المسافرون العرب

روسيا 2015 بمناسبة كاس العالم والسفر لروسيا... 380503 المسافرون العرب

روسيا 2015 بمناسبة كاس العالم والسفر لروسيا... 380504 المسافرون العرب

روسيا 2015 بمناسبة كاس العالم والسفر لروسيا... 380505 المسافرون العرب

روسيا 2015 بمناسبة كاس العالم والسفر لروسيا... 380506 المسافرون العرب

روسيا 2015 بمناسبة كاس العالم والسفر لروسيا... 380507 المسافرون العرب

روسيا 2015 بمناسبة كاس العالم والسفر لروسيا... 380508 المسافرون العرب
 

L

Luna Omar

عضو
#6
حمدلله على السلامه . جميل جدا. عندهم اجمل بنات و اجمل أطفال على الإطلاق. مناظر تفرح القلب
 
M

Mohammed El Sharnouby

عضو
#11
شكرا لطريقة الشرح دي فعلا حضرتك من الناس القليلة الي جت روسيا و عرفتها صح بس في حجات مش مظبوطة بسبب ان انتم كنتوا سياح .. مثلا التاكسي عامتا بالتليفون فقط .. الي بيبقى واقف جمب المولات و الفنادق ده بيبقى غالي للسياح ... و روسيا امان بليل عادي كل واحد في حالة محدش هيجي جمبك طول ما انت ماشي في حالك .. موضوع النشل ده في كل البلاد و دي اكتر حاجة اي سائح لازم يخلي بالة منها ... الموصلات العامة هتبقى صعبة للسياح الي ميعرفوش اللغة لكن المترو سهل جدا و كل حاجة مكتوبة بالروسي و بالانجليزي ... للاسف في بنات روسيات كتير خدو فكرة وحشة عن مصر فعلا بسبب الشباب الي شغالين فالبحر الاحمر ... بس 80% حظهم حلو و محدش بيكلمهم او هما بيبقو عاملين احتياطاتهم.
للاسف في ناس كتير واخدة فكرة غلط تماما عن روسيا بس لما بيجو بيشوفوا بنفسهم و بيغيروا رائيهم :)
 
B

Boba Mohamed

عضو
#14
طب اللي راح قريب يقولنا الفيزا بكام دلوقتي
 
G

George Suriel

عضو
#16
ميرسي على البوست الجميل ده
شوقتينا نروح نزورها ونا بحب الروس جدا
الروس فيهم الحلو بيبقي طيب ومحترم ومتعاون جدا وفيهم الوحش بيتكلم بدراعة على طول وخمور صبح ليل .. انا اتعاملت معاهم في المجال السياحى
 
A

Ayman Selem

عضو
#19
انتي طريقه كتابتك ممتعه جدا الصراحه
بعيد عن الكلام والسفر و كل الكلام ده
انتي لازم تكتبي كتير حتي لو علي صفحتك وبعد كده تشوفي مكان ياخد كلامك ده ويتنشر