تقرير مصور الاماكن السياحية واسعارها في بالي

سامح

سامح

أدارة المنتدي
طاقم الإدارة

بما إني نسيت كام حاجة كدة تعتبر مهمة جدا قلت بدل ما أعدل البوست اللي فات أبدأ بيهم في البوست دة أحسن
أولا ومش عارف إزاي نسيت أقول المعلومة دي
✈ بالي دخولها بتأشيرة بتتاخد في مطار بالي مجانا لمدة 30 يوم ..
ولو حد حابب يزود التأشيرة لـ 60 يوم بيدفع 25 دولار هناك
لا محتاجة تصريح أمني ولا كشف حساب بنك ولا أي أوراق غير باسبور جاري وتذاكر طيران وبس
--------------------

ثانيا للي حابب يأجر عربية أو سكوتر يفضل يبقى معاه رخصة دولية
بتطلع من نادي السيارات والرحلات المصري اللي في وسط البلد
دة مكانه:
دة المكان الوحيد اللي في مصر اللي تقدر تطلع منه الرخصة الدولية بتبقى صالحة لمدة سنة
بـ 10 جنيه هتطلع من هناك شهادة التحريات والرخصة نفسها بـ 500 جنيه
طلعتها وأنا هناك في 5 دقايق تقريبا المطان منظم وبينجزوا فيه بسرعة
الأوراق المطلوبة أصل رخصة السواقة المصرية والباسبور والبطاقة الشخصية وصورة من كل حاجة فيهم وممكن تصورهم هناك ببلاش طبعا برده
--------------------
محتاج pocket money كام في اليوم ..
في الحقيقة مش هعرف أقولكم كام بالظبط عشان كل واحد ودماغه أنا مثلا واحد مدمن shopping ودي بتعملي مشكلة في كل حاجة إني مبدفعش الطبيعي بتاع السفرية لازم بتبقى أكتر عشان كدة مبعرفش أرد على السؤال دة فـ لازم لما حد يسأله بقوم قايله إنت دماغك منظمها إزاي وبعدها بحدد range طبعا عشان مفيش حد هيقدر يحدد رقم بالظبط ولازم تبقوا واخدين فلوس أكتر من اللي محددينه للطوارئ .. أو لفسحة مكنتش محطوطة في الخطة "مش كل يوم هتسافروا هناك"
--------------------
ندخل بقى في المزارات والأنشطة .. هكتب كل حاجة وشرحها وبكام عشان اللي حابب يحسب بنفسه محتاج فلوس كام يجرب
هتلاقوا صور من الأماكن اللي رحتها في البوست وكل صورة مكتوب تحتها الإسم ..
-1-
Sekumpul Waterfall

شلال شمبول من أشهر الشلالات اللي في بالي المكان هناك عبارة عن متاهة فيها 7 شلالات
الطريق أخد ساعتين تقريبا بالعربية من الفندق في أوبود للمكان هناك وبعد ما ركنت العربية طلعلي واحد من الموقف بعد ما قلتله إني مش محتاج حد معايا وأنا هتعامل بنفسي قالي إن المكان عبارة عن متاهة وصعب يتراح وممكن متعرفش وإنت هناك ترجع للموقف أصلا والفرد بـ 125 ألف روبية .. وفي الحقيقة مبحبش يبقى حد حاسب عليا خطواتي ومحركني فـ شركته وقلتله لو إحتجتك هرجعلك وإنطلقنا تحت شعار No risk No fun وسبناها على ربنا .. خلونا نتفق إنه متاهة فعلا وسهل جدا الواحد يتوه وعشان كلها مزارع الـ GPS مش هيفيدكم بحاجة فـ اللي بيخاف يخليه مع tour guide أحسن بس الحقيقة رحنا ولفينا وإتصورنا ورجعنا للعربية بعد ما حوالي 4 ساعات أو أكتر .. المكان هناك عبارة عن مكان خيالي بالمعنى الحرفي للكلمة .. بالرغم إنه بعيد بس لازم يتراح بجد .. مش هتندموا
--------------------
-2-
Tegallalang Rice Terrace
رسوم الدخول: 10 آلاف روبية

مزرعة رز كلها أخضر في أخضر
من كتر الخضار اللي هتشوفوه هتحسوا براحة نفسية غريبة وتبقوا عايزين تفضلوا قاعدين فيه من غير ما تتحركوا
المزرعة فيها Bali Swing المرجيحة المشهورة والـ Nest للي حابب يتصور
المرجيحة بـ 100 ألف روبية والعش بـ 50 ألف تقريبا بس لو إنتوا عدد وهتتصوروا في الاتنين فاصلوا أحسن معاهم هناك
--------------------
-3-
Pura Tirta Empul
رسوم الدخول: 30 ألف روبية

معبد هندوسي معروف بالمياه المقدسة فيه ينابيه مقدسة للنقاء الروحي .. معبد تحفة جدا
وطبعا اللي هيدخل هيلبس السارونج الأندونيسي .. نقوا لون يبقى لايق على لبسكم وعيشوا اللحظة
--------------------
-4-
Monkey Forest
رسوم الدخول: 50 ألف روبية

غابة القرود عبارة عن غابة كبيرة جدا كلها قرود في كل مكان .. بتبقى ماشي وحواليك القرود من غير أقفاص ولا حاجة
يا ريت بس تاخدوا بالكم من حاجتكم على قد ما تقدروا لا قرد يخطف منكم حاجة كدة ولا كدة بس هتتصوروا جوة صور تحفة جدا
--------------------
-5-
Goa Gajah – Elephant Cave
رسوم الدخول: 20 ألف روبية

كهف الفيل .. بس مش هتلاقوا أي أفيال فيه عشان محدش يعشم نفسه على الفاضي
المكان كبير جدا كله منحوتات أثرية وجناين وكل مكان فيه نافورة ظريفة كدة وشلال صغير
--------------------
-6-
Tirta Gangga
رسوم الدخول: 30 ألف روبية

القصر الملكي للمياه المقدسة أو الترجمة الحرفية ليها water of the Ganges المكان عبارة عن جناين وكل مكان فيه نافورة شكلها حلو جدا وكباري صغير عشان تعدي البحيرات اللي هناك .. ومكان تاني هتلاقوه في الصور عشان مش هعرف اوصفه من جماله وحواليك هتلاقي سمك كتير جدا
--------------------
-7-
Temple Of Lempuyang Luhur

أشهر معبد في بالي اللي لازم كله يروحه عشان يتصور أشهر صورة اللي هي في المعبد اللي قدام الجبل على طول
بعيد شوية بس يستاهل الحقيقة بتدفعوا تبرع 10 آلاف روبية تبرع للمعبد عشان تاخدوا السارون وبس كدة
صورة هتفضلوا فاكرينها طول حياتكم ولما تروحوا هتعرفوا ليه
--------------------
-8-
Bali Zoo
تذكرة الدخول كانت بـ 400 وشوية ألف روبية مش فاكر الرقم بالظبط

جنينة حيوانات بالي من أكتر الحاجات اللي اتبسطت فيها الحقيقة خصوصا اني من محبي الحيوانات جدا
الجنينة منظمة ونضيفة جدا هتلاقوا شوية خيوانات بتتمشى من غير ما تكون موجودة في أقفاص عيشوا حياتكم معاهم ومتنسوش تاخدوا سيلففي معاهم
في كل مكان هتلاقوا حوض خشبي ظريف كدة بحنفية وصابون عشان تغسلوا ايدكم
واللي حابب يركب فيل أو يأكله أو يأكل حيوانات تانية هتلاقوا الاسعار مكتوبة هناك
--------------------
-9-
Tanah Lot
رسوم الدخول: 60 ألف روبية للفرد و 5000 للعربية

أشهر معابد بالي خصوصا إنه في البحر كمان الجو هناك بيبقى تحفة جدا جدا جدا
المكان كبير قوي والتصوير فيه حاجة خرافية الحقيقة من الاماكن اللي لازم تروحوها
--------------------
-10-
Bali Swing

لمحبي المرجيحة بتاعة بالي وفكرة التصوير في Nests كتيرة بخلفية تحفة يبقى دة المكان بتاعكم
هو غالي شويتين تلاتة بس ممكن تطلبوا منهم offer أحسن من غير لا أكل ولا أنشطة موجودة هناك وتتفقوا معاهم إنكم هتتصوروا بس
يستاهل الفلوس..
--------------------
-11-
Nusa Penida Island ️
جزيرة نوسا بينيدا .. جزيرة كدة تحسوها من أفلام الخيال اللي مش هتصدقوا الصور غير لما تشوفوها بعينكم
حجزت فيها رحلة يوم واحد كان الرتم فيها سريع جدا وكان نفسي الموضوع ياخد وقت أكبر رحت فيها
Angel's Billabong

Kelingking Beach
الشاطئ صاحب الصورة المعروفة بصخور كدة شبه الديناصور

Crystal Bay ️
شاطئ نضيف جدا تقدروا تنزلوا فيه المياه براحتكم

--------------------
-12-
Tegenungan Waterfall
رسوم الدخول: 15 ألف روبية

شلال من الشلالات الظريفة هناك واللي حابب ينزل المياه هناك يعيش
--------------------
-13-
Payung Rafting ‍♂♀

الرافتينج من أهم الحاجات اللي هتتبسطوا بيها جدا هناك
يفضل إنكم تحجزوا عن طريق الفندق اللي إنتوا نازلين فيه عشان تاخدوا خصم حلو
كان بيتقالي 400 ألف و 350 ألف ومن الـ guesthouse حجزولي بـ 300 ألف
أغلب الأنشطة اللي هتعملوها زي كدة خلوها من الفندق وقارنوا الأسعار اللي بتشوفوها على النت أو من السواقين اللي هتكلموهم متستعجلوش في الحجز خدوا وقتكم
--------------------
كدة دول اللي عملناهم هناك وفاكرهم فيه بقى حاجات تانية ممكن تشوفوها لو رحت بالي تاني هتبقى عشان الحاجات دي
الشلالات:
⛰ Git Git Waterfall

⛰ Nungnung Waterfall

⛰ Tukad Cepung Waterfall

⛰ Hidden Canyon Beji Guwang

--------------------
المعابد:
Uluwatu Temple

Ulun Danu Batur

Besakih Temple

Taman Ayun Temple

--------------------
الشواطئ:
️ Dreamland Beach

️ Suluban Beach

️ Green Bowl Beach

️ Virgin Beach

️ Jimbaran Beach

--------------------
⛰ طبعا ودي حاجة كان نفسي أعملها جدا hiking لجبل mount batur ودة جبل إرتفاعه 1700 متر فوق سطح البحر
ممكن تتفقوا مع الفندق إن يظبطهلكم بسعر كويس هتتحركوا من 2 ونص بليل أو 3 مثلا على ما توصلوا للمكان اللي هتبداوا منه
وبعدها توصلوا على الشروق كدة فوق الجبل ..
--------------------
لو بتحبوا روقان الدماغ والمشي يبقى تروحوا Campuhan Ridge Walk تتمشوا فيه

دة ممشى معمول في وسط الطبيعة ومزراع كلها خضار .. تمشوه في حوالي ساعتين
خدوا معاكم مياه ومتنسوش تلبسوا كوتشي مريح عشان متتعبوش بسرعة
--------------------
Upside Down World

تقريبا الدخول فيه بـ 100 ألف روبية
من الأماكن الظريفة اللي ملحقتش أروحها برده
هتتصوروا فيه صور لذيذة جدااا .. المكان معمول كل حاجة بالشقلوب
وتتصوروا كإنكم طايرين في الهوا .. شوفوا الصور بتاعته هتعجبكم جداا
--------------------
Dream Museum Zone

متحف 3D للتصوير .. اتفرجوا على الصور هتعجبكم جدا
--------------------
بوست ملخص سفريات إسكندرية:

فيديو ملخص سفرياتي في 2017

طبعا مش محتاج أقولكم أي حد محتاج يسأل في أي حاجة يكلمني في أي وقت وهحاول أساعده على قد ما أقدر
 

E

eman fawzy

مسافر جديد
متشكرة جدا على التقرير الوافي ...عندي بعض اسئلة لو سمحت هي Tegallalang Rice Terrace فيها swing and nest دول مختلفين عن بالي سوينج فايه و الرافتنج بيتعمل فين فالاماكن دي
 
سواق جزيرة بالي

سواق جزيرة بالي

مسافر
Pengemudi terbaik yang pernah saya tangani di Bali, terhormat, fasih berbahasa Arab dan Inggris, harga harian yang wajar, dan tempat-tempat wisata terkenal dengan harga terendah. Mohamed Sawak Bali
+6282297097156
 
سواق جزيرة بالي

سواق جزيرة بالي

مسافر
Pengemudi terbaik yang pernah saya tangani di Bali, terhormat, fasih berbahasa Arab dan Inggris, harga harian yang wajar, dan tempat-tempat wisata terkenal dengan harga terendah. Mohamed Sawak Bali
+6282297097156
 

أعلى