تقرير مصور لو عايز تلف العالم إبدأ ببلدك .. تعرف على تفاصيل رحلتك عبر الزمن لما وراء السد العالى( بحيرة ناصر )

hearty

طاقم الإدارة
إنضم
24 سبتمبر 2012
المشاركات
252
مستوى التفاعل
8
النقاط
18
العمر
58
الإقامة
united arab emirates

لو عايز تلف العالم إبدأ ببلدك .. تعرف على تفاصيل رحلتك عبر الزمن لما وراء السد العالى( بحيرة ناصر )

بقلم شيماء صالح

16939418_1837364319871038_2555863393610647320_n.jpg

رحلة ما وراء السد مبدئيا قبل ما نعرفك بتفاصيل الرحلة دى لازم تعرف انها رحلة نايل كروز مختلفة تماما عن رحلات الاقصر واسوان المعتادة أو المعروفه لاغلب الناس .. لان رحلات الكروز بين الأقصر وأسوان بتكون فى المجرى النهرى للنيل بين محافظتين .. إنما الرحلة دى بتبدأ من ورا السد العالى وبتعمل ابحار في بحيرة ناصر لمدة 4 أيام متواصلة لحد الوصول الى معبد ابو سمبل .. عشان كدا الرحلة دى تعتبر من اغلى الرحلات اللي ممكن تعملها فى مصر نظرا لأنها رحلة نادرة وقليل جدا للي بيفكر يخوض التجربة الفريدة دى وكمان لان عدد البواخر اللي بتنفذ الرحلة دى قليلة جدا جدا .. تقريبا 3 مراكب فقط فى البحيرة..
وانت بتحجز الرحلة دى اعرف انها رحلة استرخاء واستمتاع بالنيل وجماله الخلاب فى بحيرة ناصر واللى تعتبر أكبر بحيرة صناعية فى العالم .. ولازم تعرف انك هتبحر فى البحيرة مسافة اكتر من 280 كيلو .. هتزور كل يوم مزار واحد بس وباقي اليوم ابحار وراحة واسترخاء وهتزور كل المعابد النوبية اللي تم انقاذها بعد بناء السد العالى .. وبيكون البرنامج بتاعها غالباً كالاتى :


في الغالب الرحلة بتبدأ من أبو سمبل وعشان توصل للمدينة دي قدامك طريقتين للوصول .
  • تروح بالطيارة من القاهرة لابو سمبل ( طيران مباشر ).
  • أو تروح اسوان ومن هناك تاخد باص أو عربية و تكمل بري .والطريق دة ممكن ياخد منك ٣ او ٤ ساعات بالكتير عشان توصل .
( أو طبعا تروح تبع شركة سياحة وتتحرك معاهم من القاهرة أو اى محافظة وتنطلقوا سوا )
46485750_1127707407407378_2339071259922399232_n.jpg


البرنامج التفصيلى لرحلة ما وراء السد
اليوم الاول وزيارة معبد ابو سمبل وحضور حفل الصوت والضوء :

وبمجرد وصولك لأبو سمبل بتتجه مباشرة الى للنايل كروز اللى حجزتها وبيكون مكانها في مرسي جنب معبد ابوسمبل ، اول ما بتوصل بتسيب شنطتك و تطلع على طول على معبد أبوسمبل لانه بيقفل الساعة ٥. وللعلم هما معبدين مش معبد واحد.
والزيارة دي ممكن تاخد منك في حدود ساعتين. يعني حاول تكون هناك الساعة ٣ ده انسب ميعاد .ودة عشان تلحق تشوف المعبدين كويس و الشمس تكون هديت شوية وبردو تستمتع بالصوت والضوء اللي بيبدأ الساعة ٦ تقريبا.
ومعبد أبو سمبل من أعظم المعابد اللى ممكن تشوفها على الاطلاق وفكرة أنه منحوت في الجبل (اللي هتكتشف بعد كدة انه مش جبل ) وجمال التماثيل العملاقة المنحوتة بدقة هتحسسك بعظمة واختلاف المكان دة واد ايه انه فعلا فريد من نوعه وبعد ما تخلص جولتك داخل المعبد تروح تلحق عرض الصوت والضوء في المسرح اللي قصاد المعبد و تستمتع بغروب الشمس خلف المعبد. والعرض دة بيكون سعره 75 جنيه للمصري

اليوم الثانى وجولة بالفلوكة لزيارة القرية النوبية :

لازم تصحى الصبح بدرى تشوف الشروق وتاخد فطارك وتقعد تستجم شويه ادام منظر البحيرة وجمالها
بعدها تتحرك بالفلوكة عشان تزور القرية النوبية وتاخد احلى جولة بالفلوكة فى محمية سالوجا وغزال .. وبعدها تطلع على مطعم تاخد وجبة العشا بتاعتك وبليل تلف في جولة حرة بالسوق السياحى باسوان والمبيت بالفندق .

46292234_2126546267408779_6352096995439542272_n.jpg


اليوم الثالث زيارة متحف النوبة والسد العالى
هتصحى الصبح وتاخد الفطار بتاعك على الكروز بعدها هتتحرك على متحف النوبة وتاخد جولة هناك سريعة وبعدها هتتحرك على السد العالى وتحديدا على ميناء السد وتبدأ تخلص تصاريح الدخول للميناء وبعدها التسكين بالباخرة (بحر النوبة) .. وتناول وجبة الغداء وحضور الغروب على سطح الباخرة وبعدها العشاء والمبيت .
اليوم الرابع التوجه لزيارة معبد كلابشة والابحار لمنطقة وادي السبوع
هتصحى بدري تاخد وجبة الافطار بتاعتك وبعدها تتحرك لزيارة معبد كلابشة وبيت الوالى .. وبعدها الابحار بالباخرة فى بحيرة ناصر والتوجه لمنطقة وادى السبوع . وتناول الغداء والعشاء والمبيت .
اليوم الخامس زيارة مجموعة من المعابد
تصحى بدرى تشوف الشروق عشان دى هتكون اخر ليله ليك وتفطر على المركب واللي هتتحرك بيك لزيارة معبد وادي السبوع و معبد الدكة معبد المحرقة والعودة الى الباخرة للتحرك الى عمدا أثناء تناول الغداء ثم لزيارة معبد عمدا ومعبد الدرر ومقبرة بنوت والعودة الى الباخرة لتناول العشاء والمبيت .

اليوم السادس زيارة معبد نفرتارى

وبعد ما تخلص جولتك فى المعبد هتتوجه الى الباخرة لاستلام الشنط والاستعداد للرجوع وبكدة تكون الرحلة انتهت

45221897_2178646529076147_5100049848959238144_n.jpg


الإبحار في بحيرة ناصر
مغامرة وتجربة مختلفة خالص و هتستمتع بيها جدا . الإبحار في البحيرة مختلف تماما عن النيل. اولا المناظر مختلفة الشط هناك كله رملة و جبال وتلال مش اخضر زي النيل، ودة هيديك احساس بجمال مختلف و مناظر طبيعية مختلفة.
ثانيا البحيرة مساحتها كبيرة جدا زى ما قولنالك فى بداية المقال لدرجة أنك فى اماكن اي شط من علي الجانبين واكنك بتبحر في البحر مش النيل.
ثالثا: احساسك ان كل المناظر اللي حواليك بكر بيديك احساس مختلف وخصوصا ان الجو بيكون رائع والمناظر الطبيعية اروع.
رابعاً : هما علي الكروز بينصحوك تصحي بدري الساعة ٦ عشان تشوف شروق الشمس علي المعبد والمركب بتبدأ الإبحار قبل ماتبعد عن المعبد. فعلا جو اسطوري وانت بتبعد عن المعبد و ضوء الشمس نازل عليه و خلفية موسيقية رائعة بتشغلها المركب لإضافة لمسة جمالية للحظة. فعلا من أمتع لحظات الرحلة.
45204571_2178661119074688_6093155384258723840_n.jpg


النايل كروز الخاصة برحلة ما وراء السد العالى
  • بصفة عامة بواخر رحلة السد بيكون مستواها عالي و غالبا يتكون خمس نجوم. وغالبا دة بسبب طبيعة عشاق هذه الرحلة وصعوبة الإبحار في البحيرة عن النيل
  • الاكل مميز والستاف فوق الممتاز قمة في الادب والاحترافية وبيعملوا ليلة نوبية الوداع اخر يوم
وبكدة نكون نقلنا لك الصورة بشكل مفصل عن الرحلة وكمان قولنالك البرنامج السياحى اللى غالباً بيتعمل هناك وليك مطلق الحرية انك تنفذه لوحدك أو تطلعه تبع شركة سياحة

45274028_2178645832409550_2959903929246154752_n.jpg
 


أعلى