العمل في بروناي: السيدات و السادة السلام...

Y

Yousef ELmasry

:: الكاتب ::

العمل في بروناي:

السيدات و السادة السلام عليكم و رحمة الله و بركاته..عدنا إليكم بع د فاصل طوييل بتفاصيل العمل في سلطنة بروناي و إن شاء الله ربنا يوفقني في إني أنقل المعلومات الى أعرفها بأمانة ..و أنا اتأخرت في البوست للتأكد من كام معلومة كدة عشان محدش ياخد قرار متسرع فى السفر لبروناي
قبل أي حاجة لازم نلقي نظرة ثاقبة على الإقتصاد البروناوي حاليا و تكلفة المعيشة فيها عشان تحسب إن كانت هتنفع معاك ولا مش جايبة همها  :

أولاً إحنا اتفقنا إن قيمة الدولار البروناوي بتساوي عملة سنغافورة يعني حوالى 13 جنيه مصري ..عشان أي أرقام أكتبها تعرف تحسبها في دماغك

كوباية الشاي في إيدك؟؟...ولعت السيجارة؟؟...
و إنتي يا انسة ورقة و قلم و اكتبي ورايا يا ست الكل :

بالنسبة للإقامة هنا فالموضوع بيعتمد على الايجارات طبعا لارتفاع أسعار امتلاك العقارات..الايجار هنا ممكن يبدا ب 300 دولار بروناوى و بيوصل لألف ....ألف بروناوى ف الشهر يعني فيلا فخمة فيها جراج بقى و دلع...
بالمصري 13 ألف جنيه و لكن فعليا الألف دولار هنا زي الألف جنيه ف مصر

المية هنا مينفعش تشرب من الحنفية باي حال من الأحوال عشان كدة ممكن تشتري جركن مية عملاق جدا ممكن يكفي أربع أفراد لمدة أسبوع ب 7 دولار (أي كلمة دولار أكتبها في البوست أقصد بيها دولار بروناوي يعني 13 مصري )

الأكل هنا أغلبه رز و شطة و فراخ زي باقي الدول الأسيوية و الأسعار بتترواح بين 2 دولار و انت طالع
وجبة محترمة اوى في مطعم بتكلفك حوالى 3-8 دولار
لو هتيجب أكل فى ا لبيت و تعيش ممكن 150 دولار تلم الدنيا
العربيات بقى هنا حكايتها حكاية مبدئيا كدة..مشوفتش هنا أي موديل قديم كل العربيات فخمة و تتصور جنبها ..اللهم الا قلة قليلة معرفش ماشيين فى الشوارع ازاي ..و العربية لازم لأنه مفيش تاكسيات و عدد الباصات قليل و فى مواعيد محددة
العربية سعرها جديد بيبدأ من 15 ألف دولار و انت طالع ..يعني ممكن ب 25 ألف دولار تشتري عربية فخمة جدا
اما بقى لو ليك فى ا لمستعمل و دة بيكون بحالة ممتازة لأنهم بيحبوا يغيروا عربيات كتير فممكن ب 2000 دولار تشتري عربية تتفشخر بيها ع الناس في مصر..و خد بقى حسد للصبح
***

نيجي بقى للناس الى حابة تشتغل هنا و دول هينقسموا لتلاتة :
1- ناس معاها راس مال و عاوزة تعمل مشروع هنا
2- ناس مش معاها راس مال بس ممكن تتصرف فى مبلغ تيجي تشتغل بيه في أي شركة هنا
3- ناس مش معاها حاجة خالص (بصوت هاني رميز في فيلم غبي منه فيه) ..دول بقى احب أقولهم ..سك ع الشاي و اعمل كوباية لبن بحليب و اتفرج ع البوست و انت ساكت

أولاً : عاوز تعمل بيزنس؟؟
أهلا بيك..مبدئيا كدة لازم تعمل شركة مع شخص بروناوي و توظف على الاقل مواطن بروناوي فى الشركة دي ..زمان كانت بتتعمل بتأمين 2000 دولار..لكن عشان الحكومة بتشجع على الاستثمار فقررت تخليها 450 دولار بس و دة مبلغ معقول جدا عشان تعمل حاجة اسمها (سدرين برحد) يعني ليمتد كومباني
بس خلي بالك بقى يا عم الحلو لأنه النصب كتير جدا و ممكن تخسر فلوسك لأنك متعرفش السوق البروناوي محتاج ايه بالظبط...
يعني هنا ليل نهار في مطر فمتجيش تقول هاستورد ملمع أحذية لأنهم أصلا مش بيستعملوه لظروف الأرض و المطر و أصلا أغلبهم بيلبس شباشب و صنادل عشان الصلاة فى المساجد
يبقى معاليك قبل ما تصرف أي دولار تحاول تفهم السوق ماشية ازاي؟؟
طب هتسألني و تقولي انا اعرف منين مواطن بروناوي عشان أشاركه مشروع؟؟

أحب أقولك هتاخد رست لغاية ما أخلص أخويا الغلبان الى يدوب معاه تمن التذكرة و شوية فكة عشان الموضوع دة هيكون مشترك بينكم.
ثانيا: أخي الغلبان الذي عصفت بك الظروف في مصر و لم تعد في عداد الطبقة المتوسطة..و صفحة الوفيات تكاد تناديك بشدة...تشبث بالأمل فلعله يكون بين هذه السطور

اطفي سيجارتك يا عم الحج و تعالى أقولك على الزتونة الى تخليك تيجي هنا موظف في بروناي
مبدئيا كدة عاوزك تقرا كلامي عن تكلفة المعيشة و تحسبها فى دماغك لأنك لو اشتغلت هنا أي وظيفة مرتبك هيبقى بين 400- 500 دولار بالكتير كبداية
طب انا ممكن أشتغل ايه؟؟

بروناي دولة معروفة بالغاز و البترول عشان كدة معظم خريجي المجال دة عندهم أمل كبير يشتغل هنا..بس الوقت الحالى البترول نفسه بدأ ينفذ و بقى في اتجاه كبير لتعيين البروناويين فى وظائف محلية و لغاية اول امبارح السلطان حسن اتكلم عن الموضوع دة بصراحة كدة للشعب و قال عاوزين نبعد عن الاستثمار في مجال البترول وا لغاز الطبيعي...طب ايه المطلوب في بروناي؟
المطلوب هنا الوظائف النادرة من نوعها بحيث انه ميكونش فى بروناويين بيعرفوا يعملوا نفس الحاجة لأن الحكومة هتجبر صاحب الشركة على تعيين المواطن المحلي

طب في مجالات نقدر نعملها؟؟

أه طبعا في..الطب البيطري بمختلف أنواعه لأن الشعب البروناوي بيخاف من الأمراض المعدية جدا فمفيش أصلا كلية طب بيطري...الهندسة المعمارية
التخصصات الطبية النادرة زي الجراحة و الأورام و الحاجات الصعبة دي
و أكتر حاجة الأكل...الشعب البروناوي أكيييل جدا و مبيحبش يعمل اكل ف البيت..يعني لو هتبيع مية ساقعة فى الشارع هيشتروا منك
في مطاعم كتير بس كلهم ما شاء الله حسب ما شوفت بنفسي شغالين كويس

كمان مجال الأعشاب الطبيعية و الزراعة..دول على حد علمي و لو عرفت جديد هاعمل تعديل ان شاء الله للبوست.

طب لو انت فيك المواصفات دي هتتصرف ازاي عشان تيجي هنا موظف؟

بص يا مولانا العاشق انت و الأستاذ الى عاوز يعمل شركة هنا و الأبلة الى بتقرأ بدافع الفضول لأنها عارفة إن أهلها مش هيسيبوها حتى تسافر جمصة لوحدها

عشان تيجي هنا كموظف لازم تتواصل مع وكالة تكون مضمونة فى التعامل و دي بتكون وسيط بينك و بين الحكومة بتخلصلك الورق مع محامي و دة بيشمل التأمين على حياتك و أجر الوكالة بتدفعهم بالإضافة لتذكرة طيران

طب بكام دول ؟؟ بص يا برنس ..التذكرة بمتوسط 7000 مصري ..و انت و حظك ممكن اقل و ممكن اكتر ..انا شخصيا حجزت بخمسة و نص ...أجر الوكالة و المحامي حوالي 8000 جنيه مصري..و اجراءات السفر فى مصر و رخصة قيادة فى حدود 2000 كمان
يعني عاوز 20000 عشان تبدأ حياتك هنا و دول ممكن تستلفهم من هنا و هنا و تبيع حاجات مالهاش لازمة على شبكة المدام و الدنيا ممكن تمشي خصوصا ان 20 ألف فى مصر حاليا مش مبلغ

بس خلي بالك من نقطتين أهم من بعض:

أولاً لازم تحسب هل هتقدر تعيش هنا بالمرتب دة في ظل التكاليف دي؟؟
ثانياً: هل اتأكدت من الوكالة دي انها تمام مش مجموعة نصابين؟؟

أنا معرفش قوانين الجروب فمش هاحط عنوان أو أرقام الوكالة الى سفرتني هنا بس لو الأدمن رد بإنه متاح إن شاء الله انزل البيانات هنا للى حابب يستفسر
لا تنسوني من صالح دعائكم

سك يبنى ع الشاي
B8dpLpyq9bq8eK72WtQdL7Kumt4ge8yM.jpeg
 

المواضيع المتشابهة

A

Ahmed H. Abdullah

:: الكاتب ::
إوعى يابنى إنت و هوا تروحوا بروناى ... هتلعن اليوم اللى قررت فيه السفر للبلد دى
 
I

Islam Mohammed

:: الكاتب ::
تقريبا كده المصاريف فى رينج الخليج. بس المشكله أن إجراءات التوظيف بتمشى زى السلحفاة أستاذ يوسف لو عايز اتواصل بوزارة الصحة قسم التوظيف عشان اعرف نتيجه الأوفر اللى كنت مقدمه فى وسيلة تانيه غير الاميل أو الهاتف لأنهم مش بيردوا
 
A

Ahmed Zalat

:: الكاتب ::
طيب البزنس دا اجراءاته ايه وبيتعمل اقامه مدة اد ايه
 
M

Mamdoh Elnemr

:: الكاتب ::
انا وجهة نظري إنك تحاول تيجي زيارة وتشوف بنفسك وتقرر عاوز تعمل ايه وشكراً (ممدوح مقيم ٢٠ سنة في بروناي )
 
M

Mohamed Salah

:: الكاتب ::
الجورب ده في ميزا وعيب ميزا ممكن نستفاد من تجارب بعض عيب لي ناس تحس داخله تعمل مصلحة والخوف ان يكون ي نصب
 
M

Mohamed Gaber

:: الكاتب ::
متكلمتش حضرتك عن اللغات و ازاي الشخص يستثمر هناك و اسعار إيجارات تجاري و المعيشة و الاحياء المشهورة و هل جالية عربية كل ده مطلوب
 
E

El Anwar

:: الكاتب ::
ممكن بينات الوكالة اللي اتعامات معاها ع الخاص
 
أ

أيمن زيتون

:: الكاتب ::
رد ادمن الله يكرمك هههههههه
 

الأعضاء النشطين حاليآ الذين يشاهدون هذا الموضوع 1 ( 0 عضو و 1 ضيف )